50-ാം വയസ്സിലും ഇരുപതിന്റെ ചുറുചുറുക്ക്; ഫിറ്റ്നസ്സിൽ മലൈകയോട് മുട്ടാൻ ആരുണ്ട്!

ബോളിവുഡ് സിനിമാ ലോകത്ത് നർത്തകി, നടി, മോഡൽ, ടെലിവിഷൻ അവതാരക, നിർമ്മാതാവ് എന്നിങ്ങനെ ബഹുമുഖ പ്രതിഭയായി തിളങ്ങിനിൽക്കുന്ന താരമാണ് മലൈക അറോറ.

പ്രായം 50 ആയെങ്കിലും ഇന്നും ബി-ടൗണിലെ ഏറ്റവും ഫിറ്റ് താരങ്ങളിലൊരാളാണ് മലൈക അറോറ. പ്രായത്തെ വെല്ലുന്ന ഈ രൂപമാണ് മറ്റ് ബോളിവുഡ് താരങ്ങളിൽ നിന്ന് മലൈകയെ വേറിട്ടു നിർത്തുന്നത്.

ഫിറ്റ്‌നസ്സിന്റെ കാര്യത്തിൽ ഒരു വിട്ടുവീഴ്ചയ്ക്കും തയ്യാറാകാത്ത മലൈക, യോഗയും വ്യായാമവും ഡയറ്റും ദിനചര്യയുടെ ഭാഗമായി മുറുകെ പിടിക്കുന്നു. ഫിറ്റ്‌നസ്സ് കാര്യങ്ങളിലെ ഈ കണിശത താരത്തിന്റെ രൂപത്തിലും പ്രതിഫലിച്ചു കാണാം. മലൈക അനുദിനം ചെറുപ്പമായിക്കൊണ്ടിരിക്കുകയാണ്. ഹെയർകട്ടിനു ശേഷമുള്ള തന്റെ പുതിയ ചിത്രങ്ങൾ പങ്കിട്ടിരിക്കുകയാണ് താരം. ഇരുപതിന്റെ ചെറുപ്പമാണ് താരത്തിനെന്നാണ് ആരാധകരുടെകമന്റ്.

പ്രായത്തെ തോൽപ്പിക്കുന്ന മലൈക അറോറയുടെ ശരീര സൗന്ദര്യത്തെക്കുറിച്ച് ആരാധകർക്ക് പറയാൻ ഒന്നേയുള്ളൂ. മണിച്ചിത്രത്താഴ് സിനിമയിൽ നാഗവല്ലിയുടെ ചിത്രം നോക്കി മോഹൻലാൽ പറഞ്ഞ ആ ഡയലോഗ് തന്നെ. 'ഈ പ്രായത്തിലും എന്നാ ഒരു സ്ട്രെക്ചറാ'.

ഫിറ്റ്നസിന്റെ കാര്യത്തിൽ ഒരു വിട്ടുവീഴ്ചയ്ക്കും മലൈക തയ്യാറല്ല. ശാരീരിക, മാനസികാരോഗ്യം നിലനിർത്തുന്നതിനായി ഇന്റർമിറ്റന്റ് ഫാസ്റ്റിങ് പിന്തുടരുന്നയാളാണ് മലൈക. കർശനമായ ഭക്ഷണക്രമങ്ങൾക്കൊപ്പം മിതമായ അളവിൽ ഭക്ഷണം കഴിക്കുകയും ചെയ്യുക എന്നതാണ് മലൈകയുടെ രീതി.

അടുത്തിടെ ഒരു ടിവി ഷോയിൽ അതിഥിയായെത്തിയപ്പോൾ തന്റെ ഫിറ്റ്നസ് ദിനചര്യയെക്കുറിച്ച് മലൈക പറയുകയുണ്ടായി. ''ആരോഗ്യത്തിന് ഉറക്കം വളരെ പ്രധാനമാണെന്നു കരുതുന്ന ഒരു വ്യക്തിയാണ് ഞാൻ. വാട്ടർ തെറാപ്പിയാണ് വളരെ പ്രധാനപ്പെട്ട മറ്റൊരു കാര്യം. എല്ലാ ദിവസവും ഞാൻ ചെയ്യുന്ന ഒന്നാണിത്. ധ്യാനം, യോഗ, ശരിയായ ഭക്ഷണം എന്നിവയും എന്റെ ഫിറ്റ്നസ് ദിനചര്യയിൽ ഉൾപ്പെടുന്നു. ഇന്റർമിറ്റന്റ് ഫാസ്റ്റിങ്ങാണ് ഞാൻ പിന്തുടരുന്നത്,'' മലൈക പറഞ്ഞു.

എംടിവി ഇന്ത്യയിലെ വി.ജെ ആയാണ് മലൈക തന്റെ കരിയർ ആരംഭിച്ചത്. 'ലവ് ലൈൻ', 'സ്റ്റൈൽ ചെക്ക്' തുടങ്ങിയ പരിപാടികളിലൂടെ താരം ശ്രദ്ധിക്കപ്പെട്ടു. എന്നാൽ 1998-ൽ പുറത്തിറങ്ങിയ 'ദിൽ സേ' എന്ന ചിത്രത്തിലെ "ഛയ്യ ഛയ്യ" എന്ന ഗാനരംഗമാണ് മലൈകയെ ഇന്ത്യയൊട്ടാകെ പ്രശസ്തയാക്കിയത്. ഓടുന്ന ട്രെയിനിന് മുകളിൽ ഷാരൂഖ് ഖാനൊപ്പം മലൈക ചുവടുവെച്ച ആ ദൃശ്യം ഇന്നും സിനിമാപ്രേമികളുടെ മനസ്സിൽ മായാതെ നിൽക്കുന്നു.

'കാന്റെ', 'ഇ.എം.ഐ' തുടങ്ങിയ ചിത്രങ്ങളിൽ അഭിനയിച്ച മലൈക, "മുന്നി ബദ്‌നാം ഹുയി", "മാഹി വേ" തുടങ്ങിയ ഹിറ്റ് ഐറ്റം ഡാൻസുകളിലൂടെ ബോളിവുഡിലെ 'ക്വീൻ ഓഫ് ഐറ്റം നമ്പേഴ്സ്' ആയി മാറി.

ബോളിവുഡ് താരം സൽമാൻ ഖാന്റെ സഹോദരൻ അർബാസ് ഖാനായിരുന്നു മലൈകയുടെ ആദ്യ ഭർത്താവ്. 1998-ൽ വിവാഹിതരായ ഇരുവരും 2017-ൽ വേർപിരിഞ്ഞു. ഇവർക്ക് അർഹാൻ ഖാൻ എന്നൊരു മകനുണ്ട്. പിന്നീട് നടൻ അർജുൻ കപൂറുമായി മലൈക പ്രണയത്തിലായിരുന്നു. എന്നാൽ, വർഷങ്ങൾ നീണ്ട പ്രണയത്തിനൊടുവിൽ ഇരുവരും പിരിഞ്ഞു. വേർപിരിഞ്ഞെങ്കിലും അർജുനുമായി അടുത്ത സൗഹൃദം സൂക്ഷിക്കുന്നുണ്ട് മലൈക.