മാളവിക നായികയായ മാജീദ് മജീദിയുടെ 'ബിയോണ്ട് ദ ക്ലൗഡ്സി'ന്റെ രണ്ടാം പോസ്റ്റര്‍ പുറത്തിറക്കി

ലോകപ്രശസ്ത ഇറാനിയന്‍ സംവിധായകന്‍ മാജിദ് മജീദി മലയാളി താരം മാളവിക മോഹനനെ നായികയാക്കി ഒരുക്കുന്ന ബിയോണ്ട് ദ ക്ലൗഡ്സിന്റെ പോസ്റ്റര്‍ പുറത്തുവന്നു. കാന്‍സ് ഫിലം ഫെസ്റ്റിവലിലാണ് രണ്ടാം പോസ്റ്റര്‍ പുറത്തുവിട്ടത്.

മുംബൈയിലാണ് ചിത്രത്തിന്റെ ഷൂട്ടിംഗ് നടക്കുന്നത്.  ഫെബ്രുവരിയില്‍ ചിത്രത്തിന്റെ ആദ്യ പോസ്റ്റര്‍ ബെര്‍ലിന്‍ ഫിലിം ഫെസ്റ്റിവെലില്‍ പുറത്തുവിട്ടിരുന്നു.

നടിക്കു വേണ്ടിയുള്ള തിരച്ചിലിനൊടുവില്‍ മജീദ് മാളവികയിലേയ്ക്ക് എത്തുകയായിരുന്നു. പ്രശസ്ത ബോളിവുഡ് ഛായാഗ്രാഹകന്‍ കെയു മോഹനനന്‍റെ മകളാണ് മാളവിക.

നേരത്തെ ബോളിവുഡ് നടി ദീപികാ പദുകോൺ ചിത്രത്തിൽ നായികയാകുമെന്ന് വാർത്തകൾ വരികയും പിന്നീട് അവരെ ഒഴിവാക്കിയെന്നും റിപ്പോർട്ടുകളുണ്ടായിരുന്നു. ഈ കഥാപാത്രമാണ് മാളവികയെ തേടിയെത്തിയത്.

ദീപികയെ വെച്ച് ചിത്രത്തിന്റെ കുറച്ചു ഭാഗങ്ങള്‍ ഷൂട്ട് ചെയ്തിരുന്നു. എന്നാല്‍ ക്യാമറ ടെസ്റ്റില്‍ കഥാപാത്രത്തിന് ചേര്‍ന്ന പ്രത്യേകതകള്‍ ഇല്ലാത്തതിനാലാണ് ദീപികയെ ഒഴിവാക്കിയതെന്നാണ് സൂചന. എന്നാല്‍ തിരക്കുകള്‍ കാരണം ദീപിക പിന്മാറിയതാകാമെന്ന് ആരാധകര്‍ പറയുന്നു.

ഷാഹിദ് കപൂറിന്റെ സഹോദരന്‍ ഇഷാന്‍ ഘട്ടക്കാണ് നായകന്‍. സംവിധായകന്‍ ഗൗതം ഘോഷും ചിത്രത്തില്‍ അഭിനയിക്കുന്നുണ്ട്. പട്ടം പോലെ, നിര്‍ണ്ണായകം എന്നീ ചിത്രങ്ങളിലെ നായികയാണ് മാളവിക.