Live OTT: വി കെ പ്രകാശ് ചിത്രം 'ലൈവ്' ഒടിടിയിൽ

Live OTT: മംമ്ത മോഹൻദാസ്, സൗബിൻ ഷാഹിർ, ഷൈൻ ടോം ചാക്കോ, പ്രിയ വാര്യർ എന്നിവർ കേന്ദ്ര കഥാപാത്രങ്ങളായി എത്തിയ ചിത്രമാണ് 'ലൈവ്.' വി കെ പ്രകാശിന്റെ സംവിധാനത്തിൽ ഒരുങ്ങിയ ചിത്രം മെയ് 26 നാണ് റിലീസിനെത്തിയത്. സൈബർ ക്രൈമുമായി ബന്ധപ്പെട്ട വിഷയങ്ങളാണ് ചിത്രം കൈകാര്യം ചെയ്തത്.

പ്രിയ അവതരിപ്പിക്കുന്ന അന്ന എന്ന പെൺകുട്ടിയുടെ കഥാപാത്രത്തെ ചുറ്റിപറ്റിയാണ് കഥ വികസിക്കുന്നത്. കൃഷ്ണ പ്രഭ, അക്‌ഷിത, രശ്മി സോമൻ തുടങ്ങിയവരും ചിത്രത്തിൽ അഭിനയിക്കുന്നുണ്ട്. ഛായാഗ്രഹണം നിർവഹിക്കുന്നത് നിഖിൽ എസ്. പ്രവീണാണ്. ചിത്രസംയോജകൻ സുനിൽ എസ്. പിള്ള, സംഗീത സംവിധായകൻ അൽഫോൺസ് ജോസഫ്, കലാ സംവിധായിക ദുന്ദു രഞ്ജീവ്‌ രാധ എന്നിവരും ചിത്രത്തിന്റെ അണിയറയിൽ പ്രവർത്തിക്കുന്നു. ഫിലിംസ് 24-ന്റെ ബാനറിൽ ദർപ്പൺ ബംഗേജ, നിതിൻ കുമാർ എന്നിവരാണ് ചിത്രം നിർമിക്കുന്നത്. ഇവരുടെ മലയാളത്തിലെ ആദ്യ നിർമാണസംരംഭമാണ് ‘ലൈവ്’. മാജിക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫനാണ് ചിത്രം വിതരണം ചെയ്യുന്നത്.

മംമ്ത മോഹൻദാസ് പാടിയ ഒരു ഗാനവും ചിത്രത്തിലുണ്ട്. ‘കണ്ണാടിയിൽ കൺനട്ട നാൾ കണ്ടില്ല ഞാൻ ഇന്നലെ…’ എന്നു ഗാനമാണ് മംമ്ത പാടിയിരിക്കുന്നത്. മലയാളത്തിന് ഒരുപിടി ഹിറ്റ് ഗാനങ്ങൾ ഒരുക്കിയ അൽഫോൺസ് ജോസഫ് സംഗീത സംവിധാനം നിർവഹിക്കുന്ന ഗാനത്തിന് വരികൾ എഴുതിയിരിക്കുന്നത് മാധ്യമപ്രവർത്തകനായ വിവേക് മുഴുക്കുന്നാണ്. ചിത്രത്തിൽ പ്രിയയും ഗാനം ആലപിച്ചിട്ടുണ്ട്.

2022ൽ റിലീസ് ചെയ്ത ‘ഒരുത്തീ’യ്ക്കു ശേഷം എസ്. സുരേഷ് ബാബുവിൻ്റെ തിരക്കഥയിൽ ഒരുങ്ങിയ ചിത്രം ഒടിടിയിലെത്തി. മനോരമ മാക്സിൽ ചിത്രം സ്ട്രീം ചെയ്യാൻ ആരംഭിച്ചിട്ടുണ്ട്.