25 വർഷങ്ങൾക്കിപ്പുറം വേദിയിൽ ഒന്നിച്ച് ചുവടുവെച്ച് ചാക്കോച്ചനും ജോമോളും; വീഡിയോ

മലയാളി പ്രേക്ഷകരുടെ ഇഷ്ടതാരങ്ങളിൽ ഒരാളാണ് ജോമോൾ അഥവാ ഗൗരി. 'ഒരു വടക്കൻ വീരഗാഥ' എന്ന ചിത്രത്തിലെ കുഞ്ഞ് ഉണ്ണിയാർച്ചയായി സ്ക്രീനിലെത്തിയ ജോമോൾ പിന്നീട് നായികാ വേഷത്തിലുമെത്തി. നിറം, ദീപസ്കംഭം മഹാചര്യം, പഞ്ചാബി ഹൗസ് തുടങ്ങിയ ചിത്രങ്ങളിലൂടെ ജോമോൾ ഏറെ ശ്രദ്ധ നേടി. 'എന്ന് സ്വന്തം ജാനിക്കുട്ടി' എന്ന ചിത്രത്തിലെ പ്രകടനത്തിന് മികച്ച നടിയ്ക്കുള്ള സംസ്ഥാന പുരസ്കരവും ജോമോൾ സ്വന്തമാക്കിയിരുന്നു.

ചാക്കോച്ചനൊപ്പം നിറം, മയിൽപ്പീലിക്കാവ് എന്നീ ചിത്രങ്ങളിലും ജോമോൾ അഭിനയിച്ചിരുന്നു. ഇപ്പോഴിതാ, 25 വർഷങ്ങൾക്കിപ്പുറം ചാക്കോച്ചനൊപ്പം വേദിയിൽ ചുവടുവയ്ക്കുന്ന ജോമോളുടെ വീഡിയോ ആണ് ശ്രദ്ധ കവരുന്നത്. മയിൽപ്പീലിക്കാവിലെ 'ഒന്നാനാം കുന്നിന്മേൽ പൊൻവിളക്ക്' എന്ന ഗാനത്തിനൊപ്പമാണ് ഇരുവരും ചുവടു വച്ചത്.

അഭിനയത്തിൽ അത്ര സജീവമല്ല ജോമോളിപ്പോൾ. എന്നാൽ സിനിമാമേഖലയിൽ താരം തന്റെ സാന്നിധ്യം അറിയിക്കുന്നുണ്ട്. സബ്റ്റൈറ്റിലിങ്ങിലാണ് ജോമോൾ സജീവമാകുന്നത്. നവ്യ നായരുടെ പുതിയ ചിത്രം 'ജാനകി ജാനേ'യിലൂടെയാണ് ജോമോൾ മറ്റൊരു രംഗത്തേയ്ക്ക് ചുവടുവച്ചത്. അനീഷ് ഉപാസനയുടെ സംവിധാനത്തിൽ ഒരുങ്ങിയ ചിത്രത്തിൽ സൈജു കുറുപ്പാണ് നായകൻ.

2002 ലാണ് ജോമോൾ വിവാഹിതായായത്. ചന്ദ്രശേഖര പിള്ളയെ വിവാഹം ചെയ്ത ജോമോൾ ഹിന്ദു മതത്തിലേക്ക് മാറുകയായിരുന്നു. ഇതിനു ശേഷമാണ് ജോമോൾ ഗൗരിയെന്ന് പേരിൽ അറിയപ്പെട്ടു തുടങ്ങിയത്. ഇവർക്കു രണ്ടു പെൺകുട്ടികളുണ്ട്. തന്റെ മകളുടെ കുച്ചിപ്പുടി അരങ്ങേറ്റത്തിനെത്തിയ ജോമോളുടെ വീഡിയോയും അടുത്തിടെ സോഷ്യൽ മീഡിയയിൽ വൈറലായിരുന്നു. നടിയും നർത്തകിയുമായ നിരഞ്ജന അനൂപിന്റെ ശിഷ്യയാണ് ജോമോളുടെ മകൾ.

അമ്മയുടെ സുഹൃത്തിന്റെ മകളെ നൃത്തം പഠിപ്പിക്കാനായതിൽ ഏറെ സന്തോഷമുണ്ടെന്നാണ് നിരഞ്ജന പറയുന്നത്. തന്റെ മകൾക്ക് നൃത്തത്തിനോട് ഇത്രയും ഇഷ്ടമുണ്ടാകാൻ കാരണം നിരഞ്ജനയും അമ്മ നാരായണിയുമാണെന്ന് ജോമോളും അഭിപ്രായപ്പെട്ടു. തന്റെ നൃത്ത പഠനകാലത്തെ കുറിച്ചും ജോമോൾ പറയുന്നുണ്ട്.