ആദ്യകാഴ്ചയിൽ അഹാനയാണെന്നു തോന്നി; ശ്രദ്ധ നേടി ത്രോബാക്ക് ചിത്രം

സോഷ്യൽ മീഡിയയ്ക്ക് ഏറെ സുപരിചിതരാണ് നടനും രാഷ്ട്രീയ നേതാവുമായ കൃഷ്ണകുമാറും ഭാര്യ സിന്ധു കൃഷ്ണയും മക്കളുമെല്ലാം. അച്ഛനോളം തന്നെ പ്രശസ്തരാണ്, മക്കളായ അഹാന, ദിയ, ഇഷാനി, ഹൻസിക എന്നിവരും.

30-ാം വിവാഹ വാർഷികം ആഘോഷിക്കുകയാണ് കൃഷ്ണകുമാറും സിന്ധു കൃഷ്ണയും. വിവാഹ വാർഷികത്തോടു അനുബന്ധിച്ച് സിന്ധു കൃഷ്ണ പങ്കുവച്ച ചിത്രങ്ങളാണ് ശ്രദ്ധ നേടുന്നത്.

വിവാഹദിനത്തിൽ പകർത്തിയ ചിത്രങ്ങളിലൊന്നാണ് ഇപ്പോൾ ആരാധകർ ഏറ്റെടുത്തിരിക്കുന്നത്. അഹാനയെ പോലെ തോന്നുന്നു എന്നാണ് ആരാധകരുടെ കമന്റ്.

"സിന്ധുവും ഞാനും തമ്മിൽ കാണാൻ തുടങ്ങിയത് 93ൽ എപ്പോഴൊ ആണ്. ആദ്യ സിനിമയായ കാഷ്മീരം റിലീസിന് മുൻപ് സുഹൃത്തും സഹോദര തുല്യനുമായ അപ്പ ഹാജയുടെ "കിങ് ഷൂസ്", അവിടെ വെച്ചാണ് ആദ്യമായി ഞങ്ങൾ തമ്മിൽ സംസാരിക്കുന്നതു. പിന്നെ അത് പരിചയത്തിലേക്കും അടുപ്പത്തിലേക്കും പിന്നീട് വിവാഹത്തിലേക്കുമെത്തി," സിന്ധു കൃഷ്ണയെ പരിചയപ്പെട്ടതിനെ കുറിച്ചു മുൻപു കൃഷ്ണകുമാർ പറഞ്ഞതിങ്ങനെ.

" അന്ന് സിന്ധു സാമ്പത്തികമായി ഉയർന്ന കുടുംബത്തിലെയും ഞാൻ അത്ര സാമ്പത്തിക ഭദ്രത ഇല്ലാത്ത ഒരു കുടുംബത്തിലെ അംഗവും. ജാതിയും വ്യത്യസ്തം. പ്രശ്നങ്ങൾ ഉണ്ടാവാൻ ഇതിൽ കൂടുതൽ എന്ത് വേണം. ഇതെല്ലാം മറികടന്നു ജീവിതം ആരംഭിച്ചു. ചങ്കൂറ്റം എന്ന അദൃശ്യ ശക്തി ആവോളം തന്നു ദൈവം ഞങ്ങളെ മുന്നോട്ട് നയിച്ചു. എല്ലാ രണ്ടര വർഷത്തിലും ഓരോ നക്ഷത്രങ്ങൾക്ക് സിന്ധു ജന്മം നൽകി. ആഹാന, ദിയ, ഇഷാനി. എല്ലാവരും വാടക വീട്ടിൽ ജനിച്ചവർ. ഒടുവിൽ സ്വന്തം വീടായ "സ്ത്രീയി"ലും ഒരു താരം പിറന്നു. സുന്ദരിയായ ഹാൻസിക."

"എല്ലാ അമ്മമാരെയും പോലെ സിന്ധുവിനും മക്കളെ വളർത്താൻ വലിയ ഇഷ്ടമാണ്. സ്കൂൾ, ട്യൂഷൻ, ഡാൻസ് ക്ലാസ്സ്‌ എല്ലായിടത്തും കൂടെ കാണും. സ്ത്രീകൾ ആണ് നല്ല മാനേജർസ്. അതേ അവർ ആണുങ്ങളെക്കാൾ കാര്യങ്ങൾ നന്നായി മാനേജ് ചെയ്യുമെന്നാണ് എന്റെ വിശ്വാസം… അനുഭവം.. ഞാൻ എത്ര വരുമാനം ഉണ്ടാക്കിയാലും ഇല്ലെങ്കിലും എങ്ങനെയെങ്കിലും വീട് നടത്തി കൊണ്ടുപോകാൻ ഒരു പ്രത്യേക കഴിവ് സിന്ധുവിനുണ്ട്."

"ഇതൊക്കെ പറയുമ്പോൾ തോന്നും ഞങ്ങൾക്കിടയിൽ സ്നേഹം മാത്രമേ ഉള്ളു എന്ന്. അല്ല.. ഞങ്ങൾ തമ്മിൽ അഭിപ്രായ വ്യത്യാസങ്ങളും തർക്കങ്ങളും നല്ല വഴക്കും ഉണ്ടാകാറുണ്ട്. വലിയ പ്രശ്നങ്ങൾ ഒക്കെ നിസ്സാരമായി പരിഹരിക്കും, എന്നാൽ നിസ്സാര കാര്യങ്ങളിൽ കേറി പിടിച്ചാണ് വഴക്കുണ്ടാവുന്നത്. പക്ഷെ ഒന്നോർത്താൽ ഇതെല്ലാം കൂടിചേരുന്നതിനെയാണല്ലോ ജീവിതം എന്ന് പറയുന്നത്."

"പുറകോട്ടു നോക്കുമ്പോൾ ജീവിതത്തിന്റെ ബാലൻസ് ഷീറ്റിൽ നേട്ടങ്ങളും, ഉയർച്ചകളും, സന്തോഷവും ആണ് കാണുന്നത്. ഈ വിജയത്തിന്റെ ഒക്കെ പിന്നിൽ ഒരു വ്യക്തിയുണ്ട്, കുടുംബത്തിന്റെ അച്ചുതണ്ട് എന്ന് പറയുന്നതാവും ശെരി, കാരണം എല്ലാവരും എല്ലാ കാര്യങ്ങൾക്കും സിന്ധുവിനെ ആണ് ആശ്രയിക്കുന്നത്. സിന്ധുവിന്റെ മാതാപിതാക്കൾ സന്തുഷ്ടരാണ്, കൂടെപഠിച്ചവർ, സ്നേഹിതർ, മക്കൾ എല്ലാവരും സിന്ധുവിനാൽ സന്തുഷ്ടരാണ്. ഞാനും," സിന്ധു കൃഷ്ണയുടെ ജന്മദിനത്തിൽ കൃഷ്ണകുമാർ കുറിച്ചതിങ്ങനെ.

കൃഷ്ണകുമാർ- സിന്ധു ദമ്പതികൾക്ക് നാലു പെൺമക്കളാണ്. അച്ഛനു പിന്നാലെ അഹാന, ഇഷാനി, ഹൻസിക എന്നിവരും അഭിനയരംഗത്ത് എത്തി കഴിഞ്ഞു. അഭിനയരംഗത്ത് ഇല്ലെങ്കിലും മകൾ ദിയയും സോഷ്യൽ മീഡിയയ്ക്ക് ഏറെ സുപരിചിതരാണ്. ബിസിനസ് രംഗത്താണ് ദിയ തിളങ്ങുന്നത്. അടുത്തിടെ ദിയയുടെ വിവാഹം നടന്നിരുന്നു, അശ്വിനാണ് വരൻ.

ഇൻസ്റ്റഗ്രാമിലും യൂട്യൂബിലുമെല്ലാം ഏറെ സജീവമാണ് ഈ കുടുംബം. കുടുംബത്തിലെ ആറുപേർക്കും സ്വന്തമായി യൂട്യൂബ് ചാനലുകളുമുണ്ട്.