scorecardresearch

Latest News

‘എന്നെ കൊല്ലാന്‍ മാത്രം ധൈര്യമുളളവനില്ല’; യാഷിനെ കൊലപ്പെടുത്താന്‍ ക്വട്ടേഷന്‍ നല്‍കിയതായി പ്രചാരണം

ഗ്യാങ്സ്റ്റര്‍ സംഘത്തിലെ നാല് പേരെ അറസ്റ്റ് ചെയ്തതില്‍ നിന്നാണ് കന്നഡ താരത്തെ കൊല്ലാന്‍ തയ്യാറെടുപ്പ് നടക്കുന്നതായി വിവരം ലഭിച്ചത്

മികച്ച പ്രതികരണങ്ങളോടെ കളക്ഷന്‍ റെക്കോഡുകള്‍ തിരുത്തിയാണ് പ്രശാന്ത് നീല്‍ സംവിധാനം ചെയ്ത് യാഷ് നായകനായ കെജിഎഫ് വമ്പന്‍ ഹിറ്റായി മാറിയത്. ബാഹുബലിക്ക് ശേഷം ഇന്ത്യന്‍ ബോക്‌സ് ഓഫീസില്‍ ചലനം സൃഷ്ടിക്കുന്ന തെന്നിന്ത്യന്‍ സിനിമയായി കന്നഡ ചിത്രം മാറി.

മുമ്പില്ലാത്ത തരത്തിലുള്ള പേരാണ് യാഷ് ചിത്രം കന്നഡ ഫിലിം ഇന്‍ഡസ്ട്രിക്ക് നേടിക്കൊടുത്തിരിക്കുന്നത്. യാഷിന്റെ താരമൂല്യവും ഈ ചിത്രത്തിലൂടെ ഏറെ ഉയര്‍ന്നു. ഇതിനിടയിലാണ് താരത്തെ കൊലപ്പെടുത്താനായി ഗൂണ്ടാസംഘത്തിന് ക്വട്ടേഷന്‍ ലഭിച്ചതായി കന്നഡ മാധ്യമങ്ങള്‍ റിപ്പോര്‍ട്ട് ചെയ്തത്. ബെംഗളൂരു പൊലീസിലെ ക്രൈംബ്രാഞ്ച് സംഘം നടത്തിയ അന്വേഷണത്തിലാണ് ഒരു കന്നഡ സിനിമാ താരത്തെ കൊലപ്പെടുത്താന്‍ ക്വട്ടേഷന്‍ ലഭിച്ചതായി ഒരു ഗ്യാങ്സ്റ്റര്‍ സംഘത്തില്‍ നിന്നും വിവരം ലഭിച്ചത്.

കെജിഎഫ് എന്ന ചിത്രത്തില്‍ ഗ്യാങ്സ്റ്ററായി അഭിനയിച്ച യാഷിനെ കൊലപ്പെടുത്താനാണ് ക്വട്ടേഷന്‍ നല്‍കിയിരിക്കുന്നതെന്ന് ഇതോടെ പ്രചരിച്ചു. എന്നാല്‍ ഇത് നിഷേധിച്ച് യാഷ് രംഗത്തെത്തി. പൊലീസുമായി താന്‍ ബന്ധപ്പെട്ടെന്നും ഗ്യാങ്സ്റ്ററുകളുടെ ഹിറ്റ്‍ലിസ്റ്റില്‍ തന്റെ പേരില്ലെന്നാണ് വിവരം ലഭിച്ചതെന്നും യാഷ് പറഞ്ഞു. ‘ഈ പ്രചാരണം കാരണം എന്റെ ബന്ധുക്കളും സുഹൃത്തുക്കളുമൊക്കെ വിഷമിച്ചിരിക്കുകയാണ്. എന്നെ തൊടാന്‍ മാത്രം ധൈര്യമുളള ആരുമില്ല. ഇവിടെ സര്‍ക്കാരുണ്ട്, പൊലീസുണ്ട്, ജനങ്ങളുണ്ട്. എന്നെ കൊല്ലാന്‍ അത്ര പെട്ടെന്ന് കഴിയുമെന്ന് എനിക്ക് തോന്നുന്നില്ല,’ യാഷ് പറഞ്ഞു.

നാല് ഗുണ്ടകളെ അറസ്റ്റ് ചെയ്തതില്‍ നിന്നാണ് ഒരു കന്നഡ താരത്തെ കൊല്ലാന്‍ തയ്യാറെടുപ്പ് നടക്കുന്നതായി വിവരം ലഭിച്ചത്. ചേരി ഭാരത് എന്ന് വിളിപ്പേരുളള ഗുണ്ടാനേതാവ് ആണ് കൊല നടത്താന്‍ പദ്ധതി ഇടുന്നതെന്നും അദ്ദേഹം ഇപ്പോള്‍ ജയിലിലാണെന്നും വിരം ലഭിച്ചു. എന്നാല്‍ അത് യാഷിനെ അല്ലെന്നാണ് പൊലീസ് വ്യക്തമാക്കിയത്. സംഭവത്തില്‍ ക്രൈംബ്രാഞ്ച് അന്വേഷണം നടത്തുന്നുണ്ട്.

Stay updated with the latest news headlines and all the latest Entertainment news download Indian Express Malayalam App.

Web Title: Kgf movie star yash breaks silence on supari killing rumours