പ്രഖ്യാപനങ്ങള്‍ക്ക് പ്രസക്തിയില്ല; 'ഷാരൂഖ് ഖാന്‍ കേരളത്തെ സഹായിച്ചത് വിളിച്ചു പറഞ്ഞിട്ടല്ല'

അപ്രതീക്ഷിതമായെത്തിയ പ്രളയം വിതച്ച നാശനഷ്ടത്തില്‍ ജീവിതം തിരിച്ചു പിടിച്ചുകൊണ്ടിരിക്കുന്ന കേരള ജനതയ്ക്ക് സഹായങ്ങളുമായി നിരവധി പേര്‍ രംഗത്തെത്തിയിരുന്നു. സിനിമാ താരങ്ങളും ഇക്കൂട്ടത്തില്‍ ഉണ്ടായിരുന്നു. ഇവര്‍ നല്‍കിയ തുകകളും ഇവരുടെ പ്രവര്‍ത്തനങ്ങളും നാളേറെയായി വാര്‍ത്തകളില്‍ നിറഞ്ഞുനില്‍ക്കുകയാണ്. ബോളിവുഡിന്റെ കിങ് ഖാന്‍ ഷാരൂഖ് എന്തു ചെയ്തുവെന്ന് പലപ്പോഴും ചോദ്യങ്ങള്‍ ഉണ്ടായിരുന്നു. അതിനു മറുപടിയുമായി എത്തിയിരിക്കുകയാണ് യൂത്ത്‌ കോണ്‍ഗ്രസ് നേതാവ് സല്‍മാന്‍ നിസാമി.

താന്‍ ചെയ്തതിനെക്കുറിച്ച് ഷാരൂഖ് ട്വീറ്റ് ചെയ്തതോ, വിളിച്ചു പറഞ്ഞതോ അവകാശവാദവുമായി മാധ്യമങ്ങളെ സമീപിച്ചതോ ഇല്ലെന്നും എന്നാല്‍ അഞ്ചു കോടി നല്‍കി അദ്ദേഹം കേരളത്തെ സഹായിച്ചിരുന്നുവെന്നും പറയുന്ന സല്‍മാന്‍, ചാരിറ്റി എന്നത് വ്യവസായമല്ലെന്ന് പഠിക്കണമെന്ന് പേടിഎം തലവനെ ഉപദേശിക്കുന്നുമുണ്ട് തന്റെ ട്വീറ്റിലൂടെ.

കൂടാതെ ഷാരൂഖിന്റെ വെൽഫെയർ ഓർഗനൈസേഷനായ മീർ ഫൌണ്ടേഷനും മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നൽകിയിട്ടുണ്ട്. 21 ലക്ഷം രൂപയാണ് മീർ നൽകിയ സംഭാവന.

Let's all come together and stand with our fellow citizens. You can help the people of Kerala by using this link #KeralaFloods#StandWithKeralahttps://t.co/gnbPFtKrnz

— Meer Foundation (@MeerFoundation) August 18, 2018

നിരധിപേരാണ് പ്രളയക്കെടുതിയില്‍ കേരളത്തിന് കൈത്താങ്ങായത്. ബോളിവുഡ് താരം അക്ഷയ് കുമാര്‍ നല്‍കിയ ചെക്കുമായി സംവിധായകന്‍ പ്രിയദര്‍ശന്‍ കഴിഞ്ഞദിവസം മുഖ്യമന്ത്രിയെ കണ്ടിരുന്നു. അദ്ദേഹം ചെക്ക് നേരിട്ട് മുഖ്യമന്ത്രിക്ക് കൈമാറി.

അമിതാഭ് ബച്ചന്‍, അഭിഷേക് ബച്ചന്‍, വിദ്യാ ബാലന്‍, ശ്രദ്ധാ കപൂര്‍, സിദ്ദാര്‍ത്ഥ് മല്‍ഹോത്ര, ഹൃത്വിക് റോഷന്‍, കരണ്‍ ജോഹര്‍ തുടങ്ങിയവരും കേരളത്തിനു വേണ്ടി രംഗത്തെത്തിയിരുന്നു.