scorecardresearch

സേക്രഡ് ഗെയിംസ്’ ചതിച്ചതാ; മലയാളിയുടെ ഫോണിലേക്ക് ചറാപറാ കോളുകള്‍

സെക്രഡ് ഗെയിംസിലെ ഗ്യാങ്സ്റ്റര്‍ കഥാപാത്രമായ സുലൈമാന്‍ ഈസയുടെ എന്നവിധം പരമ്പരയില്‍ കാണിക്കുന്ന ഫോണ്‍ നമ്പര്‍ 37 കാരനായ കുഞ്ഞബ്ദുള്ളയുടേതാണ്

സേക്രഡ് ഗെയിംസ്’ ചതിച്ചതാ; മലയാളിയുടെ ഫോണിലേക്ക് ചറാപറാ കോളുകള്‍

സേക്രഡ് ഗെയിംസ് പരമ്പരയ്ക്ക് ആരാധകര്‍ ഏറെയാണ്. നെറ്റ്ഫ്‌ളിക്‌സില്‍ നിരവധി പേരാണ് സേക്രഡ് ഗെയിംസ് ദിവസവും കാണുന്നത്. എന്നാല്‍, ഇതൊന്നുമറിയാത്ത ഒരു പാവം മലയാളി യുവാവിന് സേക്രഡ് ഗെയിംസ് രണ്ടാം ഭാഗം കൊടുത്തത് നല്ല എട്ടിന്റെ പണിയാണ്. യുഎഇയിലുള്ള മലയാളി യുവാവ് കുഞ്ഞബ്ദുള്ള സി.എം.ആണ് സേക്രഡ് ഗെയിംസ് കാരണം പൊറുതിമുട്ടി ഇരിക്കുന്നത്.

സേക്രഡ് ഗെയിംസ് രണ്ടാം ഭാഗത്ത് കാണിക്കുന്ന ഒരു ഫോണ്‍ നമ്പറാണ് എല്ലാറ്റിനും കാരണം. പരമ്പരയുടെ ഒരു സീനില്‍ കാണിക്കുന്ന ഫോണ്‍ നമ്പര്‍ കുഞ്ഞബ്ദുള്ളയുടേതാണ്. സ്‌ക്രീനില്‍ എഴുതി കാണിച്ച ഈ നമ്പറിലേക്ക് ദിനംപ്രതി വരുന്നത് നിരവധി ഫോണ്‍ കോളുകളും. പാതിരാത്രിയിലും തന്റെ ഫോണിലേക്ക് കോളുകള്‍ വരുന്നതായി കുഞ്ഞബ്ദുള്ള പറയുന്നു. ലോകത്തില്‍ പലയിടത്തു നിന്നാണ് ഈ കോളുകളെല്ലാം.

Read Also: Komali, Sacred Games Season 2 in Tamilrockers: കോമാളിയും സേക്രഡ് ഗെയിംസ് സീസൺ 2 എപ്പിസോഡുകളും തമിഴ് റോക്കേഴ്സിൽ

സേക്രഡ് ഗെയിംസിലെ ഗ്യാങ്സ്റ്റര്‍ കഥാപാത്രമായ സുലൈമാന്‍ ഈസയുടെ എന്നവിധം പരമ്പരയില്‍ കാണിക്കുന്ന ഫോണ്‍ നമ്പര്‍ 37 കാരനായ കുഞ്ഞബ്ദുള്ളയുടേതാണ്. എന്താണ് സേക്രഡ് ഗെയിംസ് എന്ന് പോലും അറിയാത്ത തന്നെ തേടി നിരവധി ഫോണ്‍ കോളുകള്‍ എത്താന്‍ തുടങ്ങിയതോടെ ഈ ഫോണ്‍ നമ്പര്‍ തന്നെ ഉപേക്ഷിക്കാനുള്ള തയ്യാറെടുപ്പിലാണ് കുഞ്ഞബ്ദുള്ള.

കഴിഞ്ഞ ഞായറാഴ്ച മാത്രം തനിക്ക് കിട്ടിയത് 30 ഫോണ്‍ കോളുകളാണെന്ന് കുഞ്ഞബ്ദുള്ള പറയുന്നു. ഫോണിന്റെ ബാറ്ററി തീരുകയാണ്. കഴിഞ്ഞ ഒരു മണിക്കൂറിനിടെ അഞ്ച് ഫോണ്‍ കോളുകള്‍ വന്നു. ഈസയ്ക്ക് ഫോണ്‍ കൊടുക്കുമോ എന്നാണ് പലരും ചോദിക്കുന്നത്. സഹികെട്ട് ഫോണ്‍ ഓപ്പറേറ്റര്‍മാരെ പോലും ബന്ധപ്പെട്ടു. എന്തൊക്കെ പറഞ്ഞാലും ഈ നമ്പര്‍ തന്നെ ഉപേക്ഷിക്കാനാണ് ഇപ്പോള്‍ ആലോചിക്കുന്നതെന്ന് കുഞ്ഞബ്ദുള്ള പറയുന്നു. ആരാണ് ഈസ? തനിക്ക് അയാളെ അറിയില്ലെന്നും കുഞ്ഞബ്ദുള്ള നിസഹായനായി പറയുന്നു.

ഗ്യാങ്സ്റ്റര്‍ ഈസയുടെ നമ്പര്‍ എന്ന് പറഞ്ഞ് മറ്റൊരു കഥാപാത്രം കൈമാറുന്ന ചെറിയ കടലാസ് തുണ്ടിലാണ് കുഞ്ഞബ്ദുള്ളയുടെ നമ്പര്‍ ഉള്ളത്. കടലാസ് തുണ്ടില്‍ നമ്പര്‍ കാണിക്കുന്നില്ല. എന്നാല്‍, അത് കൈമാറുന്ന സമയത്ത് സ്‌ക്രീനില്‍ ഒരു ഫോണ്‍ നമ്പര്‍ എഴുതി കാണിക്കുന്നുണ്ട്. ആ നമ്പറാണ് കുഞ്ഞബ്ദുള്ളയുടേത്. ഇതിലേക്കാണ് സേക്രഡ് ഗെയിംസ് ആരാധകര്‍ ഫോണ്‍ ചെയ്തു കൊണ്ടിരിക്കുന്നത്.

Stay updated with the latest news headlines and all the latest Entertainment news download Indian Express Malayalam App.

Web Title: Kerala man number in sacred games second series getting phone calls