ആരുടെയും നിർബന്ധത്തിൽ പ്ലാസ്റ്റിക് സർജറി ചെയ്യരുത്; യുവതാരങ്ങൾക്ക് കാജോളിന്റെ ഉപദേശം

സിനിമ മേഖലയിലേക്ക് കാലെടുത്ത് വയ്ക്കുന്ന യുവ നായികമാർക്ക് ഒരു ഉപദേശം നൽകുകയാണ് കാജോൾ. മറ്റുള്ളവരുടെ പ്രേരണകൾക്ക് വഴങ്ങി ഒരിക്കലും പ്ലാസ്റ്റിക് സർജറി ചെയ്യരുതെന്നാണ് കാജോൾ പറയുന്നത്.

ഡിസ്നി പ്ലസ് ഹോട്ട്സ്റ്റാറിൽ സംപ്രേഷണം ചെയ്യാനാരുങ്ങുന്ന 'ട്രെയൽ' സീരീസിലാണ് കാജോൾ അടുത്തതായി എത്തുക. സൂം എന്റർടെയിൻമെന്റിനു നൽകിയ അഭിമുഖത്തിലെ ചോദ്യത്തിന് മറുപടി നൽകുകയായിരുന്നു കാജോൾ. "നിങ്ങളെ ദൈവം ഒരു പ്രത്യേക രീതിയിലാണ് സൃഷ്ടിച്ചിരിക്കുന്നത്. അത് പക്ഷെ നിങ്ങൾക്ക് വേണ്ടുന്ന രീതിയിലായിരിക്കില്ല. അതിനായാണല്ലോ മേക്കപ്പുള്ളത്," എന്നാണ് യുവ നായികമാർക്കുള്ള ഉപദേശം എന്ന രീതിയിൽ കാജോൾ പറഞ്ഞത്.

മേക്കപ്പ് ചെയ്യണോ അതോ സർജറിയോ എന്നത് അഭിനേതാവിന്റെ തീരുമാനമായിരിക്കണമെന്നും അതൊരിക്കലും നിർബന്ധത്തിന് പുറത്താകരുതെന്നും കാജോൾ കൂട്ടിച്ചേർത്തു. "വളരെ വ്യക്തിപരമായ തീരുമാനമാണത്. 25 ആളുകൾ നിങ്ങളോട് പറഞ്ഞെന്ന കാരണത്താൽ ഒരിക്കലും അത് തിരഞ്ഞെടുക്കരുത്. "

"എന്നെ കുറിച്ച് അഭിപ്രായങ്ങൾ പറയുന്നവരേക്കാൾ വളരെ ബുദ്ധിമതിയായ വ്യക്തിയാണ് ഞാനെന്ന് വിചാരിച്ചിരുന്നു. പലരും വ്യത്യസ്തമായ രീതിയിലാണ് നമ്മളെ കാണുന്നത്." തന്റെ നിറത്തിന്റെയും ശരീരഭാരത്തിന്റെയും പേരിൽ ഒരുപാട് വിമർശനങ്ങൾ നേരിടേണ്ടി വന്ന താരമാണ് കാജോൾ.

"ഒരുപാട് ആളുകൾ എന്നോട് പല കാര്യങ്ങൾ പറഞ്ഞിട്ടുണ്ട്. അതൊന്നും ഒരു രീതിയിലും എന്നെ ബാധിച്ചിട്ടില്ല. അതിനർത്ഥം ഞാൻ ചെയ്യുന്നതിൽ ശരികളുണ്ടായിരുന്നു എന്നതാണ്. അവർ പറഞ്ഞതൊന്നും ഞാൻ ഗൗരവ്വമായി സ്വീകരിച്ചിട്ടില്ല."

ജൂലൈ 14 മുതൽ 'ട്രെയൽ' ഹോട്ട്സ്റ്റാറിൽ സ്ട്രീം ചെയ്യാൻ ആരംഭിക്കും. ജിഷൂ സെൻഗുപ്ത, ഷീബ ഛദ്ദ, കുബ്ര സെയ്ട്ട് എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. നെറ്റ്ഫ്ലിക്സിലൂടെ അടുത്തിടെ പുറത്തിറങ്ങിയ 'ലസ്റ്റ് സ്റ്റാറീസ് 2' ലും കാജോൾ അഭിനയിച്ചിരുന്നു.