അപരിചിതനിലെ വെള്ളാരംകണ്ണുള്ള സുന്ദരി; മാഹിയും ജയും വേർപിരിയുന്നു

മമ്മൂട്ടി നായകനായ 'അപരിചിതൻ' എന്ന ചിത്രത്തിലെ ഗ്രാമീണ പെൺകൊടിയായി എത്തിയ മാഹി വിജിനെ അത്ര പെട്ടെന്ന് മലയാളികൾക്ക് മറക്കാനാവില്ല. വെള്ളാരംകണ്ണുള്ള ആ സുന്ദരിയുടെ കഥാപാത്രം അത്രേയേറെ ശ്രദ്ധ നേടിയിരുന്നു. 'കുയിൽപ്പാട്ടിൽ ഊഞ്ഞാലാടാം...,' എന്ന പാട്ടുസീനിലും നിറഞ്ഞു നിന്നത് മാഹിയായിരുന്നു.

14 വർഷത്തെ ദാമ്പത്യത്തിനു ശേഷം മാഹിയും ഭർത്താവ് ജയ് ഭാനുശാലിയും വേർപിരിയുന്നു എന്ന റിപ്പോർട്ടുകളാണ് പുറത്തുവരുന്നത്. ഇരുവരും സോഷ്യൽ മീഡിയയിൽ നിന്ന് ഒന്നിച്ചുള്ള ചിത്രങ്ങളെല്ലാം ഡിലീറ്റ് ചെയ്തിട്ടുണ്ട്.

ഇരുവരും ഇൻസ്റ്റാഗ്രാം അക്കൗണ്ടുകളിൽ നിന്ന് പരസ്പരം ഉള്ള ചിത്രങ്ങൾ നീക്കം ചെയ്തതോടെയാണ് വേർപിരിയൽ അഭ്യൂഹങ്ങൾ ശക്തമായത്. ഇരുവരും ജൂലൈ-ഓഗസ്റ്റ് മാസങ്ങളിലായി വിവാഹമോചന രേഖകളിൽ ഒപ്പിട്ടു എന്നാണ് റിപ്പോർട്ട്.

"പരിഹരിക്കാൻ ഏറെ ശ്രമിച്ചു, പക്ഷേ ഒന്നും മാറിയില്ല. വേർപിരിയൽ സംഭവിച്ചിട്ട് കാലങ്ങളായി. കുറച്ച് മാസങ്ങൾക്ക് മുമ്പ് അവർ വിവാഹമോചനത്തിന് അപേക്ഷ നൽകി. ജൂലൈ-ഓഗസ്റ്റ് മാസങ്ങളിൽ രേഖകളിൽ ഒപ്പിട്ട് അന്തിമമാക്കി, കുട്ടികളുടെ കസ്റ്റഡിയെക്കുറിച്ചും തീരുമാനിച്ചു."

മാഹിക്ക് ഭർത്താവിലുള്ള വിശ്വാസം നഷ്ടപ്പെട്ടതോടെയാണ് പ്രശ്നങ്ങൾ ആരംഭിച്ചത്. "ഒന്നിച്ചുള്ള വ്ളോഗുകൾക്ക് പേരുകേട്ട ഇവർ ഒരുമിച്ചുള്ള ചിത്രങ്ങൾ പോസ്റ്റ് ചെയ്യുന്നത് നിർത്തി. 2024 ജൂണിലായിരുന്നു ഇരുവരും ചേർന്ന് പങ്കുവെച്ച അവസാനത്തെ കുടുംബ പോസ്റ്റ്," താരങ്ങളോട് അടുത്ത സ്രോതസ്സ് പറയുന്നു. ഈ വർഷം ഓഗസ്റ്റിൽ മകളുടെ ജന്മദിനാഘോഷത്തിനാണ് ഇരുവരെയും അവസാനമായി ഒരുമിച്ച് കണ്ടത്.

സിനിമയിൽ നിന്ന് ബ്രേക്ക് എടുത്തെങ്കിലും സീരിയലുകളിൽ സജീവമാണ് മാഹി.

ഡൽഹിയിൽ ജനിച്ചു വളർന്ന മാഹി വിജ് മോഡലിംഗ് രംഗത്തുനിന്നുമാണ് അഭിനയത്തിലേക്ക് എത്തുന്നത്.

ഹിന്ദി സിനിമ, സീരിയൽ രംഗത്ത് ശ്രദ്ധ നേടിയ മാഹിയുടെ ആദ്യമലയാളചിത്രമായിരുന്നു അപരിചിതൻ.

ടെലിവിഷൻ അവതാരകനും നടനുമാണ് ഭർത്താവ് ജയ്‌ ഭാനുശാലി. നാച്ച് ബാലിയേ എന്ന റിയാലിറ്റി ഷോയുടെ അഞ്ചാം സീസണിൽ മാഹിയും ഭർത്താവ് ജയ് ഭാനുശാലിയും വിജയികളായിരുന്നു.

2010ലാണ് ഇരുവരും വിവാഹിതരാവുന്നത്. രാജ്‌വീർ, ഖുശീ, താര എന്നിങ്ങനെ മൂന്നുമക്കളാണ് ഈ ദമ്പതികൾക്ക് ഉള്ളത്. രാജ്‌വീറിനെയും ഖുശിയേയും ഈ ദമ്പതികൾ ദത്തെടുത്തതാണ്.