കുട്ടിക്കാലത്ത് പൂമ്പാറ്റയാവാൻ കൊതിച്ചു, 25 വയസ്സിൽ ആ സ്വപ്നം സഫലമാക്കി: ഇഷാനി

സോഷ്യൽ മീഡിയയ്ക്ക് ഏറെ പ്രിയപ്പെട്ട താരകുടുംബമാണ് നടൻ കൃഷ്ണകുമാറിന്റേത്. യൂട്യൂബിലും ഇൻസ്റ്റഗ്രാമിലുമെല്ലാം ഏറെ സജീവമാണ് ഈ കുടുംബം.  മൂത്തമകൾ അഹാനയ്ക്കും വീട്ടിലെ ഇളയ കുട്ടിയായ ഹൻസികയ്ക്കും പിറകെ കൃഷ്ണകുമാറിന്റെ മൂന്നാമത്തെ മകളായ ഇഷാനി കൃഷ്ണയും സിനിമയിൽ അരങ്ങേറ്റം കുറിച്ചിരുന്നു.

വൺ' എന്ന മമ്മൂട്ടി ചിത്രത്തിലൂടെയായിരുന്നു ഇഷാനിയുടെ  സിനിമ അരങ്ങേറ്റം. സമൂഹമാധ്യമങ്ങളിലും ഏറെ സജീവമാണ് ഇഷാനി.

ഇഷാനിയുടെ 25-ാം ജന്മദിനമായിരുന്നു കഴിഞ്ഞ ദിവസം.

പിറന്നാൾ ആഘോഷ ചിത്രങ്ങൾ പങ്കിട്ടിരിക്കുകയാണ് ഇഷാനി. "ഒരു പൂമ്പാറ്റയെപ്പോലെ ഇരിക്കുക എന്നതായിരുന്നു എൻ്റെ കുട്ടിക്കാലത്തെ സ്വപ്നം... അത് ഉപേക്ഷിക്കുന്നതിനു പകരം, ഞാൻ എൻ്റെ 25-ാം പിറന്നാളിൻ്റെ തീം ആക്കി മാറ്റി," എന്നാണ് ചിത്രങ്ങൾക്ക് ഇഷാനി നൽകിയ അടിക്കുറിപ്പ്.

ബട്ടർഫ്ളൈ ഡിസൈനിലുള്ള ഡ്രസ്സാണ് ഇഷാനി അണിഞ്ഞത്. വയലറ്റ്, പർപ്പിൾ കളർ ടോണിലാണ് ബർത്ത് ഡേ തീം ഒരുക്കിയത്.

ജയറാമും മകൻ കാളിദാസും ഒന്നിച്ചഭിനയിക്കുന്ന ചിത്രം ‘ആശകൾ ആയിരം’ എന്ന ചിത്രത്തിൽ നായികയായി എത്തുകയാണ് ഇഷാനി ഇപ്പോൾ.

വടക്കൻ സെൽഫി , സത്യം പറഞ്ഞാൽ വിശ്വസിക്കുവോ? എന്നീ ചിത്രത്തിലൂടെ ശ്രദ്ധ നേടിയ ജി.പ്രജിത്താണ് ഈ ചിത്രം സംവിധാനം ചെയ്യുന്നത്. ചിത്രത്തിന്റെ നിർമ്മാണ ജോലികൾ പുരോഗമിക്കുകയാണ്.

ഇരുപത്തിരണ്ടു വർഷങ്ങൾക്ക് ശേഷം ജയറാമും കാളിദാസും ഒരുമിച്ചഭിനയിക്കുന്ന സിനിമ കൂടിയാണിത്. സായ് കുമാർ, അജു വർഗീസ്, ആശാ ശരത്ത്, ബൈജു സന്തോഷ്, കൃഷ്ണശങ്കർ, സഞ്ജു ശിവറാം, ഉണ്ണിരാജ, ശങ്കർ ഇന്ദുചൂഡൻ, ഇഷാൻ ജിംഷാദ്, നിഹാരിക, നന്ദൻ ഉണ്ണി, സൈലക്സ് ഏബ്രഹാം, ശ്യാംലാൽ ,ഗോപൻ മങ്ങാട്ട് എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു.