കാളിദാസ് പറഞ്ഞ അളിയനിതോ?

ജയറാമിനെയും പാർവതിയേയും കാളിദാസനെയും പോലെ സോഷ്യൽ മീഡിയയ്ക്ക് ഏറെ സുപരിചിതയാണ് മാളവിക ജയറാമും. അടുത്തിടെയാണ് മാളവികയുടെ ഇൻസ്റ്റഗ്രാം ചിത്രങ്ങളിലൂടെ തന്റെ ബോയ്ഫ്രണ്ടിനെ കുറിച്ചുള്ള സൂചനകൾ താരം നൽകിയത്. ജയറാമിനും പാർവതിയ്ക്കും കാളിദാസിനും കാളിദാസിന്റെ ഗേൾഫ്രണ്ടായ തരിണിയ്ക്കുമൊപ്പം വെക്കേഷൻ ആഘോഷിക്കുന്നതിനിടയിൽ പകർത്തിയ ചിത്രങ്ങൾ മാളവിക പങ്കവച്ചപ്പോൾ കൂട്ടത്തിലൊരു ചെറുപ്പക്കാരനും ഉണ്ടായിരുന്നു. എന്നാൽ ആ ചെറുപ്പക്കാരന്റെ മുഖം മറഞ്ഞിരിക്കുന്ന രീതിയിലുള്ള ചിത്രങ്ങളാണ് മാളവിക ഷെയർ ചെയ്തത്.

ആരാണ് കൂടെയുള്ള ചെറുപ്പക്കാരൻ എന്നായിരുന്നു ആരാധകർ മാളവികയോട് തിരക്കിയത്. എന്നാൽ പോസ്റ്റിനു താഴെ കാളിദാസ് ഇട്ട കമന്റ് ആ ചോദ്യങ്ങൾക്കെല്ലാം ഉത്തരമേകുകയായിരുന്നു. 'അളിയാ' എന്നായിരുന്നു കാളിദാസിന്റെ കമന്റ്.

ഇപ്പോഴിതാ, മാളവികയുടെ പുതിയ ഇൻസ്റ്റ സ്റ്റോറിയും ശ്രദ്ധ നേടുകയാണ്. "ജീവിതത്തിൽ ഞാനെടുത്ത ഏറ്റവും നല്ല തീരുമാനത്തിന് സന്തോഷകരമായ ജന്മദിനം നേരുന്നു. ഞാൻ എന്നേക്കുമായി നിന്നെ സ്നേഹിക്കുന്നു," എന്ന അടിക്കുറിപ്പോടെയാണ് ചിത്രം മാളവിക പങ്കുവച്ചിരിക്കുന്നത്. ചിത്രത്തിലുള്ള ചെറുപ്പക്കാരനാണോ മാളവികയുടെ ബോയ്‌ഫ്രണ്ട്, കാളിദാസ് പറഞ്ഞ അളിയനിതോ എന്നൊക്കെയാണ് ആരാധകർ സംശയമുയർത്തുന്നത്.

കഴിഞ്ഞ ദിവസം മാളവിക ഷെയർ ചെയ്ത ഇൻസ്റ്റഗ്രാം സ്റ്റോറിയും ശ്രദ്ധ നേടിയിരുന്നു. കാറില്‍ കൈകൾ ചേർത്തുപിടിച്ചിരിക്കുന്ന രണ്ടുപേരെ ഇൻസ്റ്റഗ്രാം സ്റ്റോറിയിൽ കാണാം, ഒപ്പം ഒരു ഹിന്ദി പ്രണയഗാനവും. മാളവിക പ്രണയത്തിലാണോ എന്ന സംശയം ആരാധകർ അന്നും ഉയർത്തിയിരുന്നു.

മാളവിക സിനിമയിൽ അരങ്ങേറ്റം കുറിക്കുന്നത് എപ്പോഴാണെന്ന കാത്തിരിപ്പിലാണ് ആരാധകർ. എൻജോയ് എൻജാമി എന്ന ഹിറ്റ് മ്യൂസിക് വീഡിയോ സംവിധാനം ചെയ്ത 'മായം സെയ്തായ് പൂവേ' എന്ന മ്യൂസിക് വീഡിയോയിൽ അശോക് ശെൽവനൊപ്പം മാളവിക സ്ക്രീനിലെത്തിയിരുന്നു.

ഓൺലൈൻ ചാനലായ ബിഹൈൻഡ്‌വുഡ്സിന് നൽകിയ അഭിമുഖത്തിൽ തന്റെ സിനിമ പ്രവേശനത്തെ കുറിച്ച് മാളവിക മനസ് തുറന്നിരുന്നു. തന്റെ കംഫര്‍ട്ടബിള്‍ സോണ്‍ ഏതാണെന്ന് കണ്ടുപിടിക്കേണ്ടിയിരിക്കുന്നു എന്നാണ് മാളവിക പറഞ്ഞത്. തമിഴില്‍ ഏറ്റവും ഇഷ്ടപ്പെട്ട താരം വിജയ് ആണെന്നും വിജയുടെ ഒരു കടുത്ത ആരാധികയാണെന്നും മാളവിക പറഞ്ഞു. മലയാളത്തില്‍ ഒരു അവസരം ലഭിക്കുകയാണെങ്കില്‍ തനിക്ക് അഭിനയിക്കാന്‍ ഏറെ ഇഷ്ടം അടുത്ത സുഹൃത്ത് കൂടിയായ ഉണ്ണിമുകുന്ദനൊപ്പം ആണെന്നും അതിനൊരു കാരണം ഉണ്ടെന്നും തന്റെ ഉയരത്തിനും തടിക്കും കറക്ടായ മലയാളത്തിലെ നടന്‍ ഉണ്ണി മുകുന്ദന്‍ ആണെന്നും മാളവിക പറഞ്ഞിരുന്നു.

ചില സാരി പരസ്യങ്ങളിലും ടെലിവിഷൻ പരസ്യങ്ങളിലുമൊക്കെ മോഡലായി മാളവിക എത്തുകയും ചെയ്തിരുന്നു. മലബാർ ഗോൾഡിന് വേണ്ടിയുള്ള ഒരു പരസ്യ ചിത്രത്തില്‍ മാളവികയും ജയറാമും ഒരുമിച്ചഭിനയിച്ചിട്ടുണ്ട്.