രൺബീറിന്റെയും ആലിയയുടെയും 250 കോടിയുടെ പുതിയ ബംഗ്ലാവ്; ചിത്രങ്ങൾ പുറത്ത്

രൺബീർ കപൂറിന്റെയും ആലിയ ഭട്ടിന്റെയും 250 കോടി രൂപയുടെ പുതിയ ബംഗ്ലാവ് വീടിന്റെ വിശേഷങ്ങളാണ് ഇപ്പോൾ ശ്രദ്ധ നേടുന്നത്. നവംബർ മാസത്തിൽ നടന്ന വീടിന്റെ പൂജ ചടങ്ങിൽ നിന്നുള്ള ചിത്രങ്ങൾ പങ്കിട്ടിരിക്കുകയാണ് ​ആലിയ.

രൺബീറിന്റെ മുത്തശ്ശിയും പ്രശസ്ത സംവിധായകൻ രാജ് കപൂറിന്റെ ഭാര്യയുമായ കൃഷ്ണ കപൂറിന്റെ പേരാണ് ഈ ബംഗ്ലാവിന് നൽകിയിരിക്കുന്നത്. ആറുനിലകളിലായി വ്യാപിച്ചു കിടക്കുകയാണ് ഈ വീട്.

2022 ഏപ്രിലിൽ ഇരുവരും വിവാഹിതരാവുന്നതിനു മുൻപു തന്നെ ബംഗ്ലാവിന്റെ നിർമാണപ്രവർത്തനങ്ങൾ ആരംഭിച്ചിരുന്നു. വർഷങ്ങളായി രൺബീറും ആലിയയും ഈ ബംഗ്ലാവിന്റെ മേൽനോട്ടവുമായി തിരക്കിലായിരുന്നു. തിരക്കുകൾക്കിടയിലും ഇരുവരും നിരന്തരം സൈറ്റ് സന്ദർശിച്ച് നിർമാണ പുരോഗതി പരിശോധിക്കാറുണ്ടായിരുന്നു. ഇപ്പോഴിതാ, ആലിയയുടെയും രൺബീറിന്റയും ആ വലിയ സ്വപ്നം സഫലമായിരിക്കുകയാണ്.

ബാന്ദ്രയിലാണ് ആറുനിലകളുള്ള കൃഷ്ണരാജ് ബംഗ്ലാവ് സ്ഥിതി ചെയ്യുന്നത്. ഏകദേശം 250 കോടി രൂപ ചെലവഴിച്ച് നിർമ്മിച്ചിരിക്കുന്ന ഈ വീടിന്റെ ഓരോ ബാൽക്കണികളിലും പച്ചപ്പിന്റെ സാന്നിധ്യം കാണാം. അകത്തായി വലിയതും സുന്ദരവുമായ ഷാൻഡ്ലിയേഴ്‌സും കാണാം.

നവംബർ 8ന് മകൾ റാഹ കപൂറിന്റെ മൂന്നാം പിറന്നാൾ ആഘോഷവും ഈ വീട്ടിലാണ് നടന്നതെന്ന് റിപ്പോർട്ടുണ്ട്.

ചരിത്രപരമായി ഏറെ പ്രാധാന്യമുള്ള ഒന്നാണ് കൃഷ്ണരാജ് ബംഗ്ലാവ്. ഈ ബംഗ്ലാവ് ആദ്യം രാജ് കപൂറിന്റെ ഭാര്യ കൃഷ്ണയുടേതായിരുന്നു. തുടർന്ന്, 1980ൽ അത് മകൻ ഋഷി കപൂറിനും ഭാര്യ നീതു കപൂറിനുമായി കൈമാറ്റം ചെയ്യപ്പെട്ടു. ഈ വീട്ടിലേക്ക് താമസം മാറും മുൻപ്, റൺബീറും ആലിയയും ബാന്ദ്രയിലെ വാസ്തു അപ്പാർട്ട്മെന്റിലാണ് താമസിച്ചിരുന്നത്. 2022ൽ വിവാഹം നടന്നതും ഈ വീട്ടിലാണ്.