ജോലി തുടങ്ങിയത് 12-ാം വയസ്സിൽ, ആദ്യ പ്രതിഫലം ഒരു പാക്കറ്റ് ബിസ്ക്കറ്റ്;പിന്നീട് സെൻസേഷൻ താരമായി മാറി

"ഹരി ഓം ഹരി", "രംഭ ഹോ", "ജബ് ചായേ തേരാ ജാദൂ" തുടങ്ങിയ സൂപ്പർഹിറ്റ് ഗാനങ്ങളിലൂടെ സ്ക്രീനിൽ അഗ്നി പടർത്തിയ കല്പന അയ്യർ ദശകങ്ങൾക്ക് ശേഷവും പ്രേക്ഷകരുടെ മനസ്സിൽ ഇന്നും ജീവിക്കുന്നു.

അടുത്തിടെ ഒരു വിവാഹച്ചടങ്ങിൽ "രംഭ ഹോ" എന്ന പാട്ടിന് അവർ ചുവടുവെച്ച വീഡിയോ വൈറലായപ്പോൾ, ലോകം തിരിച്ചറിഞ്ഞത് ആ നക്ഷത്രം ഇന്നും തിളങ്ങുന്നുണ്ടെന്നാണ്.

പ്രശസ്തയായ മോഡലായി തന്റെ പന്ത്രണ്ടാം വയസ്സിൽ കരിയർ തുടങ്ങിയ അവർ ബോളിവുഡിലെ ശ്രദ്ധേയമായ സാന്നിധ്യമായി മാറി. എന്നാൽ കരിയറിന്റെ ഉച്ചസ്ഥായിയിൽ നിൽക്കുമ്പോഴാണ് അവർ സിനിമയിൽ നിന്നും വിട്ടുനിൽക്കാൻ തീരുമാനിച്ചത്.

ഒരു പ്രമുഖ പ്രൊഡക്ഷൻ ബാനറിന് കീഴിൽ ജോലി ചെയ്തതിന് ശേഷം അവർ ദുബായിലേക്ക് താമസം മാറി. സിനിമയിലെ സാഹചര്യങ്ങൾ തനിക്ക് അനുകൂലമല്ലെന്നും, സ്വന്തം അധ്വാനത്തിന്റെ ഫലം ചോദിച്ചുവാങ്ങേണ്ടി വരുന്നത് മടുപ്പിക്കുന്നതാണെന്നും അവർ വെളിപ്പെടുത്തിയിരുന്നു.

തമിഴ്നാട്ടിൽ നിന്ന് ഒളിച്ചോടി വിവാഹം കഴിച്ച തമിഴ് അയ്യർ ദമ്പതികളുടെ മകളായിട്ടാണ് കല്പനയുടെ ജനനം. ദേവ് ആനന്ദിന്റെ 'കല്പന' എന്ന സിനിമയോടുള്ള ഇഷ്ടം കാരണമാണ് അവർ മകൾക്ക് ആ പേരിട്ടത്. പന്ത്രണ്ടാം വയസ്സിൽ ആറംഗ കുടുംബത്തിന്റെ ഭാരം കല്പനയുടെ തോളിലായി. ഔദ്യോഗികമായി നൃത്തം പഠിച്ചിട്ടില്ലാത്ത അവർ അതിജീവനത്തിനായി നൃത്തം ചെയ്തു തുടങ്ങി. ഒരു പാക്കറ്റ് ഗ്ലൂക്കോസ് ബിസ്ക്കറ്റായിരുന്നു കല്പനയുടെ ആദ്യ പ്രതിഫലം. പിന്നീട് അത് 50 രൂപയായും 75 രൂപയായും ഉയർന്നു.

ഒരു സ്കൂൾ വാർഷിക പരിപാടിക്കിടെ മുകേഷ് ശർമ്മ എന്ന കലാകാരൻ അവരെ കണ്ടെത്തുകയും വിദേശ ഷോകളിൽ പങ്കെടുപ്പിക്കുകയും ചെയ്തു. അതോടെ കല്പനയുടെ ജീവിതം മാറിമറിഞ്ഞു.

കടം വാങ്ങിയ വസ്ത്രങ്ങളും ചെരിപ്പുകളുമായി 1975-ലെ 'നേവി ക്വീൻ' മത്സരത്തിൽ പങ്കെടുത്ത കല്പന റണ്ണറപ്പായി തിരഞ്ഞെടുക്കപ്പെട്ടു. മോഡലിംഗിൽ തിളങ്ങിയ അവർ രാജ്ശ്രീ ഫിലിംസിന്റെ 'മനോകാമന'യിലൂടെ സിനിമയിൽ എത്തി. ദേവ് ആനന്ദിന്റെ 'ലൂട്ട്മാർ' എന്ന ചിത്രത്തിലെ ഒരു ഡാൻസ് നമ്പറിലൂടെ അവർ കൂടുതൽ ശ്രദ്ധിക്കപ്പെട്ടു. ആ ഒരൊറ്റ ഗാനം കണ്ട് പിറ്റേദിവസം തന്നെ നാല് ചിത്രങ്ങളിലേക്കാണ് അവർ കരാറൊപ്പിട്ടത്.

സിനിമയിൽ അവസരങ്ങൾ കുറഞ്ഞപ്പോൾ കല്പന ടെലിവിഷനിലേക്ക് തിരിഞ്ഞു. 'കാശിഷ്', 'ജുനൂൻ' തുടങ്ങിയ പരമ്പരകൾ വൻ വിജയമായി. 'ഹം സാത്ത് സാത്ത് ഹേൻ' എന്ന ചിത്രത്തിന് ശേഷം 1999-ൽ അവർ ദുബായിലേക്ക് മാറി.

"എനിക്ക് നിരാശ തോന്നി. കാര്യങ്ങൾ ശരിയല്ലെന്ന് എനിക്ക് തോന്നിത്തുടങ്ങി. എനിക്ക് കിട്ടേണ്ട പണത്തിനായി ആളുകളെ ഓർമ്മിപ്പിക്കേണ്ടി വരുന്നത് എനിക്ക് സഹിക്കാനായില്ല. സെറ്റുകളിലേക്ക് പോകുന്നത് ഒരു ഭാരമായി മാറി," സിനിമ വിട്ടതിനെ കുറിച്ച് അവർ പറഞ്ഞതിങ്ങനെ.

ദുബായ് അവർക്ക് സമാധാനവും സുരക്ഷിതത്വവും നൽകി. അവിടെ ഒരു സുഹൃത്തിന്റെ കേറ്ററിംഗ് യൂണിറ്റിൽ ജോലി ചെയ്യുകയും കുടുംബത്തോടൊപ്പം സ്വസ്ഥമായി കഴിയുകയും ചെയ്തു.

കല്പന അയ്യർ വിവാഹിതയായില്ല. തന്റെ സഹോദരപുത്രനെയാണ് സ്വന്തം മകനായി അവർ വളർത്തുന്നത്. ജീവിതത്തിൽ വലിയ സങ്കടമായി അവർ കാണുന്നത് പണമുണ്ടാക്കാനുള്ള നെട്ടോട്ടത്തിനിടയിൽ സഹോദരങ്ങൾക്കൊപ്പം ചെലവഴിക്കാൻ സമയം കിട്ടിയില്ല എന്നതാണ്.

ഇന്ന് വീണ്ടും ക്യാമറയ്ക്ക് മുന്നിലെത്താൻ അവർ ആഗ്രഹിക്കുന്നു. "പ്രായത്തിന് അനുയോജ്യമായ വേഷങ്ങൾ ചെയ്യാൻ ഞാൻ തയ്യാറാണ്. 'ഹം സാത്ത് സാത്ത് ഹേൻ' മുതൽ ഞാൻ ആ ഒരു ഫോൺ വിളിക്കായി കാത്തിരിക്കുകയാണ്," കല്പന അയ്യർ പറഞ്ഞു.

കല്പന അയ്യർ