ഹൃത്വിക് റോഷന്റെ ആകെ ആസ്തി എത്രയെന്നറിയാമോ?

ബോളിവുഡ് താരം ഹൃത്വിക് റോഷന്റെ 52-ാം ജന്മദിനമായിരുന്നു ശനിയാഴ്ച. 'വാർ', 'ക്രിഷ്' പരമ്പര തുടങ്ങിയ വമ്പൻ ഹിറ്റുകളിലൂടെ ജനപ്രീതി നേടിയ ഹൃത്വിക്, സിനിമയ്ക്ക് പുറത്തും വലിയൊരു സാമ്പത്തിക സാമ്രാജ്യം തന്നെ കെട്ടിപ്പടുത്തിട്ടുണ്ട്.

ജിക്യൂ ഇന്ത്യയുടെ റിപ്പോർട്ട് പ്രകാരം ഏകദേശം 3,100 കോടി രൂപയാണ് ഹൃത്വികിന്റെ ആസ്തി. ഇന്ത്യയിലെ ഏറ്റവും സമ്പന്നനായ 'സ്റ്റാർ കിഡ്' കൂടിയാണ് ഹൃത്വിക്.

ഒരു സിനിമയ്ക്ക് 100 കോടി രൂപ വരെ പ്രതിഫലം വാങ്ങുന്ന ഹൃത്വിക്കിന്റെ വരുമാനത്തിന്റെ വലിയൊരു ഭാഗം HRX എന്ന അദ്ദേഹത്തിന്റെ ഫിറ്റ്നസ് ബ്രാൻഡിൽ നിന്നാണ്. നിലവിൽ ഏതാണ്ട് 7,300 കോടി രൂപ മൂല്യമുള്ളതാണ് ഈ ബ്രാൻഡ്.

മുംബൈയിലെ ഏറ്റവും വിലപിടിപ്പുള്ള വീടുകളും കാറുകളും ഉൾപ്പെടുന്ന ഹൃത്വിക്കിന്റെ ആഡംബര ശേഖരം ആരെയും അത്ഭുതപ്പെടുത്തുന്നതാണ്.

മുംബൈയിലെ ജൂഹുവിലുള്ള 38,000 ചതുരശ്ര അടി വിസ്തീർണ്ണമുള്ള കൂറ്റൻ വസതിയിലാണ് ഹൃത്വിക് താമസിക്കുന്നത്. രണ്ട് വലിയ അപ്പാർട്ട്മെന്റുകൾ കൂട്ടിയോജിപ്പിച്ച് ഒരുക്കിയ ഈ 'സ്കൈ വില്ലയ്ക്ക്' ഏതാണ്ട് 100 കോടി രൂപയാണ് ചെലവായതെന്ന് ഇക്കണോമിക് ടൈംസ് റിപ്പോർട്ട് ചെയ്യുന്നു. 14, 15, 16 നിലകളിലായി വ്യാപിച്ചു കിടക്കുന്ന ഈ വീട്ടിൽ നിന്ന് അറബിക്കടലിന്റെ മനോഹരമായ കാഴ്ച ആസ്വദിക്കാനാകും. ഒരു ഹോം തിയേറ്റർ, സ്വകാര്യ ജിം, മക്കൾക്കായി ഒരു ചോക്ലേറ്റ് വെൻഡിംഗ് മെഷീൻ എന്നിവയും ഇവിടെയുണ്ട്.

ഇതുകൂടാതെ, ലോണാവാലയിൽ ഏഴ് ഏക്കറിൽ വ്യാപിച്ചുകിടക്കുന്ന ഒരു ഫാം ഹൗസും ഹൃത്വിക്കിനുണ്ട്. ഏകദേശം 33 കോടി രൂപ വിലമതിക്കുന്ന ഈ വില്ലയിൽ നീന്തൽക്കുളവും ജൈവകൃഷി തോട്ടവുമുണ്ട്.

ജൂഹുവിലും അന്ധേരിയിലുമുള്ള വാണിജ്യ കെട്ടിടങ്ങളിൽ ഹൃത്വിക്കും പിതാവ് രാകേഷ് റോഷനും ചേർന്ന് 55 കോടി രൂപയുടെ നിക്ഷേപം നടത്തിയതായി മണി കൺട്രോൾ റിപ്പോർട്ട് ചെയ്യുന്നു. വലിയ കമ്പനികൾക്ക് വാടകയ്ക്ക് നൽകിയിരിക്കുന്ന ഈ കെട്ടിടങ്ങൾ ഹൃത്വിക്കിന് സ്ഥിരവരുമാനം ഉറപ്പാക്കുന്നു.

ബാംഗ്ലൂരിലും ദുബായിലെ പാം ജുമൈറയിലും ഹൃത്വിക്കിന് ആഡംബര വസ്തുവകകൾ ഉള്ളതായി റിപ്പോർട്ടുകളുണ്ട്.