കരയുന്ന ആൺകുട്ടികൾ; വിനീതിന്റെയും ധ്യാനിന്റെയും കണ്ണീർ ഒരു ഓർമ്മപ്പെടുത്തലാണ്!

"ആണുങ്ങൾ കരയരുത്" - തലമുറകളായി നമ്മുടെ സമൂഹം ആൺകുട്ടികളെ പഠിപ്പിച്ചുവെച്ചിരിക്കുന്ന വലിയൊരു തെറ്റായ പാഠമാണിത്. സങ്കടം ഉള്ളിലൊതുക്കി, വികാരങ്ങൾ പുറത്തുകാണിക്കാതെ കല്ലുപോലെ ഇരിക്കുന്നതാണ് പൗരുഷം എന്ന് വിശ്വസിച്ചിരുന്നവർക്ക് മുന്നിലാണ് അച്ഛന്റെ അന്ത്യയാത്രയിൽ  വിനീതും ധ്യാനും പൊട്ടിക്കരയുന്ന ദൃശ്യങ്ങൾ എത്തിയത്. ആ കണ്ണീർ സത്യത്തിൽ ശ്രീനിവാസൻ എന്ന അച്ഛൻ തന്റെ മക്കൾക്ക് നൽകിയ ഏറ്റവും വലിയ സ്വാതന്ത്ര്യത്തിന്റെ അടയാളമാണ്.

Also Read: ഒരു ക്രിസ്ത്യാനി തന്ന 400 രൂപ, മുസ്ലീമായ മമ്മൂട്ടി തന്ന രൂപയ്ക്ക് ഹിന്ദുവായ പെൺകുട്ടിയുടെ കഴുത്തിൽ ഞാൻ കെട്ടിയ സ്വർണ്ണത്താലി

ശ്രീനിവാസൻ എന്ന നടനെയോ തിരക്കഥാകൃത്തിനെയോ നമുക്കെല്ലാവർക്കും അറിയാം. എന്നാൽ അദ്ദേഹം മക്കൾക്ക് നൽകിയ 'സ്പേസ്' എത്രത്തോളം വലുതാണെന്ന് ഈ നിമിഷം നമ്മെ ഓർമ്മിപ്പിക്കുന്നു. സ്വന്തം സങ്കടങ്ങളെ മൂടിവെക്കാതെ, ഒരു മനുഷ്യനായി നിലകൊള്ളാൻ ആ മക്കൾക്ക് സാധിക്കുന്നത് അവരുടെ വളർത്തൽ അത്രമേൽ സുരക്ഷിതമായതുകൊണ്ടാണ്. തങ്ങളുടെ ഉള്ളിലെ വികാരങ്ങളെ സ്വാഭാവികമായി സ്വീകരിക്കാനും പ്രകടിപ്പിക്കാനും കഴിഞ്ഞാലേ ഒരാൾക്ക് 'തനി മനുഷ്യനായി' മാറാൻ കഴിയൂ എന്ന് ശ്രീനിവാസൻ മക്കളെ പഠിപ്പിച്ചു.

Also Read:  ആ ശ്രീനിവാസൻ മാജിക്കിനെ രജനികാന്തിനോ ഷാരൂഖ് ഖാനോ പോലും  മറികടക്കാനായില്ല

ജീവിതത്തിൽ ഒരുപാട് കഷ്ടപ്പാടുകൾ അനുഭവിച്ചാണ് ശ്രീനിവാസൻ ഇന്നത്തെ നിലയിലെത്തിയത്. ജപ്തി ചെയ്ത വീട്ടിൽ നിന്നും തന്റെ രണ്ടു ചെറിയ ആൺമക്കളെയും ഭാര്യയെയും ചേർത്തുപിടിച്ച് ഇറങ്ങേണ്ടി വന്ന അച്ഛന്റെ ആ വേദനയെക്കുറിച്ച് വിനീത് ഒരിക്കൽ പറഞ്ഞിട്ടുണ്ട്. വസ്ത്രം വാങ്ങാൻ സുഹൃത്തിന്റെ ഭാര്യയുടെ വള വിൽക്കേണ്ടി വന്നതും, താലി വാങ്ങാൻ മമ്മൂട്ടിയോട് കടം വാങ്ങേണ്ടി വന്നതുമെല്ലാം ശ്രീനിവാസൻ ചിരിയോടെയാണ് ഓർത്തെടുക്കാറുള്ളത്. ഉള്ളിൽ നോവുമ്പോഴും ലോകത്തെ ചിരിപ്പിക്കാൻ അദ്ദേഹത്തിന് കഴിഞ്ഞു. പക്ഷേ, ആ കഷ്ടപ്പാടുകൾക്കിടയിലും തന്റെ മക്കളെ രണ്ടു സ്വതന്ത്രവ്യക്തികളായെന്ന പോലെ കണ്ട് വളർത്തി.  ആ കരുതലാണ് ഇന്ന് ആ മക്കളെ ഇത്രമേൽ നോവിപ്പിക്കുന്നത്.

Also Read: ആയുസ്സിലെ ഏറ്റവും വേദനയുള്ള പിറന്നാൾ; ജന്മദിനത്തിൽ അച്ഛന്റെ വിയോഗം, കരച്ചിലടക്കാനാവാതെ ധ്യാൻ

പൗരുഷമല്ല, മനുഷ്യത്വമാണ് വലുത്

മരണവീടുകളിൽ പോലും നിയന്ത്രണങ്ങൾ പാലിച്ച് നിൽക്കുന്ന പുരുഷന്മാരെ കണ്ടുശീലിച്ചവർക്ക്, മക്കൾ അച്ഛന്റെ അന്ത്യയാത്രയിൽ തേങ്ങുന്നത് കൗതുകമായേക്കാം. എന്നാൽ അത് ആ അച്ഛനോടുള്ള സ്നേഹത്തിന്റെ ആഴമാണ്. ശ്രീനിവാസന്റെ മക്കൾ അച്ഛനെ സ്നേഹിക്കുന്നത് അദ്ദേഹം വലിയൊരു നടനായതുകൊണ്ടല്ല, മറിച്ച് തങ്ങളുടെ വികാരങ്ങളെ മാനിച്ച, തങ്ങളെ മനുഷ്യരായി കണ്ട ഒരു വലിയ മനസ്സിന്റെ ഉടമയായതുകൊണ്ടാണ്.

ഒരു അച്ഛൻ എങ്ങനെയാകണം എന്നതിന് ഉത്തമ ഉദാഹരണമായി ആ രണ്ടു മക്കളെയും അദ്ദേഹം വളർത്തി. ആൺകുട്ടികളെ വികാരങ്ങൾ പ്രകടിപ്പിക്കാൻ അനുവദിക്കൂ. അവരെ കരയാൻ അനുവദിക്കൂ. അപ്പോൾ മാത്രമേ അവർക്ക് മറ്റുള്ളവരുടെ സങ്കടങ്ങളെയും തിരിച്ചറിയാൻ കഴിയൂ എന്ന് ഇന്ന് ആ മക്കൾ ലോകത്തോടു പറയുന്നു. 

ശ്രീനിവാസൻ എന്ന അച്ഛൻ തന്റെ സിനിമകളിലൂടെ എന്നപോലെ ജീവിതത്തിലൂടെയും വലിയൊരു പാഠം ബാക്കിവെച്ചാണ് പോകുന്നത്: "സത്യസന്ധമായി സ്നേഹിക്കാനും സങ്കടപ്പെടുമ്പോൾ കരയാനും കഴിയുന്നവനാണ് യഥാർത്ഥ മനുഷ്യൻ.".

Also Read: 'ശ്രീനിയേട്ടന്റെ ശരീരത്തിൽ തീയാളുകയാണിപ്പോൾ, ആ മുഖത്തിനു മുന്നിൽ ക്ലാപ്പ് ബോർഡ് പിടിച്ചുനിന്ന പയ്യൻ ഒറ്റക്കാണ്'