ഡോൺ പാലത്തറ സംവിധാനം ചെയ്ത് ന്യൂട്ടൺ സിനിമ നിർമ്മിച്ച ‘ഫാമിലി’ 14-ാമത് ബെംഗളൂരു അന്താരാഷ്ട്ര ചലച്ചിത്രമേളയിൽ ഇന്ത്യൻ പനോരമ വിഭാഗത്തിൽ പ്രദർശിപ്പിക്കും. ഇന്റർനാഷണൽ ഫിലിം ഫെസ്റ്റിവൽ റോട്ടർഡാമിൽ ലോക പ്രീമിയർ പ്രദർശിപ്പിച്ച ചിത്രത്തിന്റെ ഇന്ത്യൻ പ്രീമിയർ ആണ് ഇത്.
ചിത്രത്തിൽ സോണി എന്ന പ്രധാന കഥാപാത്രത്തെ അവതരിപ്പിക്കുന്നത് വിനയ് ഫോർട്ടാണ്. സമകാലിക ഇന്ത്യയിലെ കുടുംബ ബന്ധങ്ങളുടെ സങ്കീർണ്ണതകളും വൈരുദ്ധ്യങ്ങളുമാണ് ചിത്രം പറയുന്നത്. സൂക്ഷ്മമായ പ്രകടനങ്ങൾ, കാവ്യാത്മകമായ ഛായാഗ്രഹണം, ചിന്തോദ്ദീപകമായ പ്രമേയങ്ങൾ എന്നിവയാൽ സിനിമ ഇതിനോടകം നിരൂപകശ്രദ്ധ നേടികഴിഞ്ഞു.
ഒരു മാതൃകാ ക്രിസ്ത്യാനിയായ സോണി നാട്ടുകാർക്ക് കൈത്താങ്ങായും സാമ്പത്തികമായി ബുദ്ധിമുട്ടുന്ന കുട്ടികളെ സഹായിച്ചും സന്നദ്ധ പ്രവർത്തനങ്ങളുമൊക്കെയായി എപ്പോഴും സജീവമാണ്. ഒരു കുടുംബം ദുരന്തത്തിൽ അകപ്പെടുമ്പോൾ, അവരെ സാമ്പത്തികമായി പുനരധിവസിപ്പിക്കാൻ സോണി പള്ളിയുമായി ചർച്ച നടത്തുന്നു. ഈ ചെറിയ കത്തോലിക്കാ ഗ്രാമത്തിന്റെ ഹൃദയമിടിപ്പാണ് സോണി. എന്നിരുന്നാലും ആ ഇമേജിനപ്പുറം, അസ്വഭാവികമായി അവന്റെ സ്വഭാവത്തിൽ എന്തെങ്കിലുമുണ്ടോ? ഗ്രാമാന്തരീക്ഷം, മതം എന്നതിനെല്ലാം അപ്പുറം കേരള സമൂഹത്തെ സൂക്ഷ്മമായി നിരീക്ഷിക്കുന്ന ഒരു ചിത്രമാണ് ഫാമിലി.
ഡോൺ പാലത്തറയും ഷെറിൻ കാതറിനും ചേർന്നാണ് ചിത്രത്തിന്റെ രചന നിർവഹിച്ചിരിക്കുന്നത്. ജലീൽ ബാദുഷയാണ് ഛായാഗ്രഹണം. ദിവ്യപ്രഭ, നിൽജ കെ ബേബി, അഭിജ ശിവകല, മാത്യു തോമസ്, ജോളി ചിറയത്ത്, മനോജ് പണിക്കർ, ഇന്ദിര എ കെ, സജിത മഠത്തിൽ എന്നിവരാണ് മറ്റ് പ്രധാന അഭിനേതാക്കൾ.
“’ഫാമിലി’യുടെ ആദ്യ ഇന്ത്യൻ പ്രദർശനം ബാംഗ്ലൂർ ഇന്റർനാഷണൽ ഫിലിം ഫെസ്റ്റിവലിൽ സാധിച്ചതിൽ വലിയ ആഹ്ളാദമുണ്ട് , ഞങ്ങളുടെ സിനിമ ബംഗളൂരുവിലെ പ്രേക്ഷകരുമായി പങ്കിടാൻ അവസരമൊരുക്കിയതിൽ ഫെസ്റ്റിവലിന് നന്ദി. സമകാലിക ഇന്ത്യയുടെ സങ്കീർണ്ണതകളെക്കുറിച്ച് ‘ഫാമിലിക്ക് ‘ പ്രധാനപ്പെട്ട ചിലത് പറയാനുണ്ടെന്ന് ഞങ്ങൾ വിശ്വസിക്കുന്നു. ” നിർമ്മാതാവ് ന്യൂട്ടൺ പറയുന്നു.
14-ാമത് ബെംഗളൂരു അന്താരാഷ്ട്ര ചലച്ചിത്രോത്സവം 2023 മാർച്ച് 23 മുതൽ 28 വരെ നടക്കും. സമകാലിക ഇന്ത്യൻ സിനിമയിലെ ഏറ്റവും മികച്ച ചിത്രങ്ങൾ പ്രദർശിപ്പിക്കുന്ന ഇന്ത്യൻ പനോരമ വിഭാഗത്തിലാണ് ‘ഫാമിലി’ പ്രദർശിപ്പിക്കുന്നത്.
