ഫഹദും നസ്രിയയും ഒന്നിച്ചുള്ള സിനിമയ്‌ക്ക് ഇനി അധികം കാത്തിരിക്കേണ്ട

രണ്ടു മൂന്നു വര്‍ഷങ്ങളേ നസ്രിയ നസീം എന്ന നടി സിനിമയില്‍ ഉണ്ടായിരുന്നുള്ളൂ. പിന്നീട് ഫഹദ് ഫാസിലുമായുള്ള വിവാഹത്തിനു ശേഷം നസ്രിയ അഭിനയ ജീവിതത്തില്‍ നിന്നും ഒരു ഇടവേളയെടുത്തു. പിന്നീടുള്ള നാലു വര്‍ഷങ്ങളിലും ഇടയ്‌ക്കിടെ പ്രേക്ഷകര്‍ ചോദിച്ചൊരു ചോദ്യമുണ്ട് 'നസ്രിയ എന്ന് സിനിമയിലേക്ക് മടങ്ങി വരും?' കാത്തിരിപ്പിനൊടുവില്‍ അഞ്ജലി മേനോന്റെ 'കൂടെ' എന്ന ചിത്രത്തിലൂടെ നസ്രിയ തിരിച്ചുവരികയാണ്.

അഞ്ജലി മേനോന്റേയും നസ്രിയയുടേയും അവസാനം ചിത്രം ബാംഗ്ലൂര്‍ ഡേയ്‌സ് ആയിരുന്നു. ചിത്രത്തില്‍ ഫഹദിന്റെ നായികയായിരുന്നു നസ്രിയ. ദിവ്യ എന്ന കഥാപാത്രത്തെ നസ്രിയയും ദാസ് എന്ന കഥാപാത്രത്തെ ഫഹദും അവതരിപ്പിച്ചു. നസ്രിയയുടെ മടങ്ങിവരവിനെ കുറിച്ചുള്ള ഉത്തരം കിട്ടിയപ്പോള്‍ പ്രേക്ഷകരുടെ അടുത്ത ചോദ്യം ഫഹദും നസ്രിയയും ഒരുമിച്ചൊരു ചിത്രം എപ്പോള്‍ വരും എന്നാണ്. അതിനുള്ള മറുപടി വനിതയ്‌ക്കു നല്‍കിയ അഭിമുഖത്തില്‍ നസ്രിയ പറയുന്നുണ്ട്.

'ഞാനും ഫഹദും ഉടനെ ഒരു സിനിമയില്‍ ഒരുമിച്ച് അഭിനയിക്കുന്നുണ്ട്. പക്ഷെ ഏതു സിനിമ, ആരാണ് സംവിധായകന്‍ എന്നുള്ളതൊക്കെ സസ്‌പെന്‍സാണ്,' എന്നാണ് നസ്രിയ പറയുന്നത്.

വിവാഹത്തിനു ശേഷം നസ്രിയ മാത്രമല്ല, ഫഹദും സിനിമയില്‍ നിന്നും ഒരു വര്‍ഷം വിട്ടു നിന്നിരുന്നു. എന്നാല്‍ അതാരും പറയുന്നില്ലെന്നാണ് അഭിമുഖത്തില്‍ നസ്രിയ പറയുന്നത്. വിവാഹ ശേഷം, ദിലീഷ് പോത്തന്‍ സംവിധാനം ചെയ്‌ത 'മഹേഷിന്റെ പ്രതികാരം' എന്ന ചിത്രത്തില്‍ മാത്രമാണ് ഫഹദ് അഭിനയിച്ചത്. പിന്നീട് ഒരു വര്‍ഷത്തെ ഇടവേളയെടുത്താണ് ഫഹദ് തിരിച്ച് സിനിമയില്‍ എത്തിയത്.

നസ്രിയയെ വീണ്ടും സിനിമയില്‍ കാണാന്‍ കഴിയുന്നതില്‍ താന്‍ അത്യധികം സന്തോഷിക്കുന്നുവെന്ന് ഫഹദ് നേരത്തേ പറഞ്ഞിരുന്നു. തനിക്കൊരു കുടുംബം നല്‍കാന്‍ വേണ്ടിയാണ് നസ്രിയ നാലുവര്‍ഷം സിനിമ വേണ്ടെന്നു വച്ചതെന്നും ഫഹദ് പറഞ്ഞിരുന്നു.