ടൊവീനോ തോമസ്‌, ഉര്‍വ്വശി എന്നിവരെ പ്രധാന കഥാപാത്രങ്ങളാക്കി ജോസ് സെബാസ്റ്റ്യന്‍ സംവിധാനം ചെയ്യുന്ന ‘എന്റെ ഉമ്മാന്റെ പേര്’ ടീസര്‍ റിലീസ് ചെയ്തു. നടന്‍ ദുല്‍ഖര്‍ സല്‍മാന്‍ ആണ് തന്റെ സോഷ്യല്‍ മീഡിയ ഹാന്‍ഡിലിലൂടെ ഈ ക്രിസ്മസ് ചിത്രത്തിന്റെ വരവറിയിച്ചത്.

“എന്റെ സഹോദരന്‍ ടൊവീനോയുടെ അടുത്ത ചിത്രം വളരെ സ്പെഷ്യല്‍ ആയിരിക്കും എന്നൊരുവാഗ്ദാനം തരുന്നുണ്ട്. എത്ര സുന്ദരമായ പേരും ടീസരും. ടൊവീനോയ്ക്കും ടീമിനും എന്റെ ആശംസകള്‍, റോക്ക് ഓണ്‍ ടൊവീ..”, ദുല്‍ഖര്‍ ഫേസ്ബുക്കില്‍ പറഞ്ഞു

 

ജോസ് സെബാസ്റ്റ്യനും ശരത് ആര്‍.നാഥും ചേര്‍ന്നാണ് തിരക്കഥ. ചിത്രത്തില്‍ ഹമീദ് എന്ന കഥാപാത്രമായാണ് ടൊവിനോ അഭിനയിക്കുന്നത്.

ടൊവിനോയുടെ കഥാപാത്രത്തിന്റെ ഉമ്മയായി ഉര്‍വ്വശി എത്തുന്നു എന്നതാണ് ചിത്രത്തിന്റെ പ്രധാന ഹൈലൈറ്റ്. സിനിമയുടെ ടൈറ്റിലില്‍ മാത്രമല്ല, സിനിമയിലും ശ്രദ്ധേയമായൊരു റോള്‍ തന്നെയാണ് ഉര്‍വ്വശിക്കെന്ന വാര്‍ത്തകളാണ് ലഭിക്കുന്നത്. ഒരു അമ്മയും മകനും തമ്മിലുള്ള ആത്മബന്ധത്തിന്റെ കഥ നര്‍മ്മത്തില്‍ ചാലിച്ച് പറയുകയാണ് ചിത്രം.

Read More: ഹമീദായി ടൊവിനോ; ‘എന്റെ ഉമ്മാന്റെ പേര്’ ചിത്രങ്ങൾ

ചിത്രത്തിന്റെ ടൈറ്റില്‍ പോസ്റ്റര്‍ കഴിഞ്ഞ ദിവസം റിലീസായിരുന്നു. മാമുക്കോയ, സിദ്ദിഖ്, ശാന്തികൃഷ്ണ, ദിലീഷ് പോത്തന്‍, ഹരീഷ് കണാരന്‍ എന്നിങ്ങനെ നിരവധി താരങ്ങളും ചിത്രത്തിലുണ്ട്.

ചിത്രത്തിന്റെ സംഗീതം ഗോപിസുന്ദറും എഡിറ്റിങ് മഹേഷ് നാരായണനും നിർവ്വഹിക്കും. സ്പാനിഷ് ഛായാഗ്രാഹകനായ ജോർഡി പ്ലാനെൽ ആണ് ക്യാമറ കൈകാര്യം ചെയ്യുന്നത്. ആന്റോ ജോസഫും സി.ആർ.സലിമും ചേർന്ന് നിർമ്മിക്കുന്ന ചിത്രം. കോഴിക്കോട്, തലശ്ശേരി, പൊന്നാനി, കണ്ണൂർ എന്നിവിടങ്ങളിലാണ് ചിത്രീകരിച്ചത്.  മലയാളം കണ്ട എക്കാലത്തെയും  മികച്ച നടിയായ ഉര്‍വ്വശിയും യുവതാരം ടോവീനോയും ചേരുന്ന മാജിക്കിനായി കാത്തിരിക്കുകയാണു പ്രേക്ഷകര്‍.  ‘എന്റെ ഉമ്മാന്റെ പേര്’ ഡിസംബര്‍ 21ന് റിലീസ് ചെയ്യും.

Read More: ഉര്‍വ്വശിയെന്ന ‘ഓൾറൗണ്ടർ’

Get all the Latest Malayalam News and Kerala News at Indian Express Malayalam. You can also catch all the Entertainment News in Malayalam by following us on Twitter and Facebook