ദീപിക മിൽക്ക് ഷേയ്ക്ക് തട്ടിയിട്ട ഹോട്ടൽ, ഗ്ലാസ് പൊട്ടിച്ച ഹോട്ടൽ; ഇങ്ങനെയൊക്കെയാണ് ഞങ്ങൾ, ദീപിക പറയുന്നു

ഷാരൂഖ് ഖാനൊപ്പമുള്ള 'പഠാനി'ലാണ് ബോളിവുഡ് താരം ദീപിക പദുക്കോൺ അവസാനമായി അഭിനയിച്ചത്. ഷാരൂഖിന്റെ സെപ്റ്റംബർ 7ന് ഇറങ്ങുന്ന ജവാനിലും ദീപിക പ്രധാന വേഷം ചെയ്യുന്നുണ്ട്. കുടുംബവുമൊത്തുള്ള ചില രസകരമായ കാര്യങ്ങൾ പങ്കുവെയ്ക്കുന്ന ദീപികയുടെ വീഡിയോയാണ് ഇപ്പോൾ ശ്രദ്ധ നേടുന്നത്.

കുട്ടിയായിരിക്കുമ്പോൾ കുടുംബവുമൊത്ത് റസ്റ്റോറന്റുകളിൽ പോകുന്നതിനെക്കുറിച്ചുള്ള ഓർമ്മകളാണ് താരം പങ്കുവയ്ക്കുന്നത്. "പോകുന്ന റസ്റ്റോറന്റിന്റെ പേരുകൾ ഓർത്തിരിക്കുന്നത് വളരെ കുറവാണ്. അതിന് പകരം ദീപിക മിൽക്ക് ഷേയ്ക്ക് കമിഴ്ത്തിയ കട, അല്ലെങ്കിൽ ദീപിക ഫോർക്ക് താഴെയിട്ട ഹോട്ടൽ, ദീപിക സ്വീറ്റ് കോൺ സ്വന്തം ദേഹത്ത് വീഴ്ത്തിയ ഹോട്ടൽ എന്നിങ്ങനെയാണ് വീട്ടിൽ ഓരോ റസ്റ്റോറന്റുകളെയുംക്കുറിച്ച് ഓർത്തിരുന്നത്," ദീപിക പറയുന്നു.

സിനിമകൾക്ക് ഒപ്പം തന്നെ അന്താരാഷ്ട്ര വേദികളിലും ഫാഷൻ - ചലച്ചിത്രമേളകളിലുമെല്ലാം പ്രത്യക്ഷപ്പെടാറുള്ള ഇന്റർനാഷണൽ താരമാണ് ദീപിക പദുകോൺ. 2018ലാണ് ബോളിവുഡ് താരം രൺവീർ സിങ്ങിനെ ദീപിക വിവാഹം ചെയ്തത്. ബോളിവുഡിലെ പവർ കപ്പിൾ എന്നാണ് ഇരുവരും അറിയപ്പെടുന്നത്.