കഥയുടെ അടിസ്ഥാനത്തിലാണ് താന്‍ സിനിമ തിരഞ്ഞെടുക്കുന്നതെന്ന് ബോളിവുഡിലെ സൂപ്പര്‍ താരം ആമിര്‍ ഖാന്‍. ഹിന്ദി സിനിമയിലെ പെര്‍ഫെക്ഷനിസ്റ്റ് എന്നറിയപ്പെടുന്ന ആമിര്‍, തിരക്കഥയിലാണ് ഒരു സിനിമയുടെ ആരൂഢമിരിക്കുന്നത് എന്ന് താന്‍ വിശ്വസിക്കുന്നതായും പറഞ്ഞു.

“ഒരു സിനിമ സൈന്‍ ചെയ്യുമ്പോള്‍ ഞാന്‍ നോക്കുന്നത് കഥയോ തിരക്കഥയോ ആണ്. മറ്റു അഭിനേതാക്കളും സാങ്കേതിക പ്രവര്‍ത്തകരുമെല്ലാം സിനിമയുടെ ഭാഗമാണ്, പക്ഷേ എല്ലാം തുടങ്ങുന്നത് എഴുത്തുകാരനിലാണ്,” ആമിര്‍ വ്യക്തമാക്കി.

“സിനിമയുടെ തുടക്കം മാത്രമല്ല, ഏറ്റവും പ്രധാനപ്പെട്ട വശവും കൂടിയാണ് എഴുത്ത്,” ആമിര്‍ കൂട്ടിച്ചേര്‍ത്തു. സിനെസ്ഥാന്‍ പോര്‍ട്ടല്‍ നടത്തുന്ന ഇന്ത്യാസ് സ്റ്റോറിറ്റെല്ലര്‍ സ്ക്രിപ്റ്റ് കോണ്‍ടസ്റ്റിന്റെ വിധികര്‍ത്താക്കളില്‍ ഒരാളാണ് നടനും നിര്‍മ്മാതാവും സംവിധായകനുമായ ആമിര്‍ ഖാന്‍.

 

പുതിയ എഴുത്തുകാരില്‍ നിന്നും എന്താണ് പ്രതീക്ഷിക്കുന്നത് എന്ന ചോദ്യത്തിന് ആമിറിന്റെ ഉത്തരം ഇങ്ങനെയായിരുന്നു.

“വ്യത്യസ്തമായ കഥ, കഥാപരിസരം, ഭാവന എന്നിവയാണ് പ്രധാനമായും നോക്കുന്നത്. കൃത്യമായി നിര്‍വ്വചിക്കപ്പെട്ട ലക്ഷ്യങ്ങള്‍ ഉള്ള, നന്നായി എഴുതപ്പെട്ട കഥാപാത്രങ്ങള്‍, നമ്മളെ പിടിച്ചിരുത്തുന്നതും എന്റര്‍റൈനിംഗും ആയ കഥ. അതാണു ഒരു നല്ല തിരക്കഥയില്‍ നോക്കുന്നത്,” ആമിര്‍ വിശദമാക്കി.

Read in English Logo Indian Express

തനതായ തന്റെ കയ്യൊപ്പു പതിഞ്ഞ സിനിമകൾ പ്രേക്ഷകരിലേക്ക് എത്തിക്കുന്നതിൽ ഏറെ ശ്രദ്ധിക്കുന്ന താരമാണ് ആമിർ ഖാൻ. ‘ലഗാൻ’, ‘രംഗ് ദേ ബസന്തി’, ‘താരേ സമീൻ പർ’, ‘പികെ’, ‘ഡങ്കൽ’ എന്നു തുടങ്ങി ‘തഗ്സ് ഓഫ് ഹിന്ദോസ്ഥാൻ’ വരെ നീളുന്ന ആമിർ ഖാൻ ചിത്രങ്ങൾക്കെല്ലാം ട്രീറ്റ്മെന്റിലെയും പരീക്ഷണത്തിലെയും ആ പുതുമ അവകാശപ്പെടാനുണ്ട്. പരീക്ഷണങ്ങളുമായി മുന്നോട്ടു പോവാനല്ല, എന്തെങ്കിലും പുതിയതായി ശ്രമിച്ചു നോക്കാതെ ഇരിക്കുന്ന അവസ്ഥയെയാണ് താൻ ഭയക്കുന്നതെന്ന് ആമിർ പറയുന്നു.

ടാറ്റാ സ്കൈയിൽ സംപ്രേക്ഷണം ചെയ്യുന്ന ‘ആമിർ കി പാത്ത്ശാല’ എന്ന പ്രോഗ്രാമിൽ സംസാരിക്കുന്നതിനിടയിലായിരുന്നു താരത്തിന്റെ വെളിപ്പെടുത്തൽ. “പരാജയപ്പെടുമോ​ എന്ന ഭയം എനിക്കില്ല. പരാജയപ്പെട്ടാലോ എന്നോർത്ത് ഒന്നും ശ്രമിക്കാതെയിരിക്കുന്നതാണ് എന്നെ ഭയപ്പെടുത്തുന്നത്. നിർമ്മാതാവോ സംവിധായകനോ ആവട്ടെ, ഒരു കഥ പ്രേക്ഷകർ സ്വീകരിക്കുമ്പോൾ എന്റെ കലയിലൂടെ ഞാനെന്തോ നേടിയെന്ന ഫീലാണ് അനുഭവിക്കുന്നത്,” ആമിർ പറയുന്നു.

Read more: ഞാനൊരു കലാകാരനാണ്, പക്ഷേ രാഷ്ട്രീയം എന്റെ കലയല്ല: ആമിർ ഖാൻ

കഥകൾ തിരഞ്ഞെടുക്കാനുള്ള ആമിറിന്റെ കഴിവ് ഏറെ നിരൂപക പ്രശംസ നേടിയിട്ടുള്ള കാര്യമാണ്. ചെറുപ്പം മുതൽ തന്നെ പിതാവും സംവിധായകനുമായ താഹിർ ഹുസൈൻ ഇക്കാര്യത്തിൽ ആമിറിനെ സ്വാധീനിച്ചിട്ടുണ്ട്. ഈ കഥയെ ഒരൊറ്റ വാക്കിൽ നീ എങ്ങനെ വിശദീകരിക്കും? എന്താണ് നിന്റെ കഥാപരിസരം? എന്നിങ്ങനെയുള്ള പിതാവിന്റെ നിരന്തരമായ ചോദ്യങ്ങളാണ് കഥകൾ തിരഞ്ഞെടുക്കുന്നതിലുള്ള ആമിറിന്റെ കഴിവിന് അടിത്തറ പാകിയത്.

“എന്റെ സിനിമകളിൽ ഒരു രൂപ പോലും ഞാൻ പ്രതിഫലമായി വാങ്ങാറില്ല. മുടക്കു മുതൽ തിരിച്ചു കിട്ടിയെന്ന് ഉറപ്പു വരുത്തേണ്ടതും സിനിമയ്ക്കു പിന്നിലുള്ള എല്ലാവർക്കും പ്രതിഫലം ലഭിച്ചു എന്നു ഉറപ്പു വരുത്തേണ്ടതും എന്റെ ഉത്തരവാദിത്തമായി ഞാൻ കരുതുന്നു. ഈ കാര്യങ്ങൾ യഥാവിധം നടന്നു കഴിയുമ്പോൾ മാത്രമാണ് ലാഭത്തിൽ നിന്നും ഞാനെന്റെ ഷെയർ എടുക്കുന്നത്,” ആമിർ കൂട്ടിച്ചേർത്തു.

 

അമിതാഭ് ബച്ചനൊപ്പം ആദ്യമായി കൈകോർക്കുന്ന ‘തഗ്‌സ് ഓഫ് ഹിന്ദോസ്ഥാൻ’ ആണ് ഏറ്റവും ഒടുവിലായി തിയേറ്ററിൽ എത്തിയ ആമിർ ചിത്രം. യഷ് രാജ് ഫിലിംസ് നിർമ്മിച്ച  ബ്രഹ്മാണ്ഡചിത്രത്തിൽ കത്രീന കെയ്ഫ്, ഫാത്തിമ സന ഷെയ്ഖ് എന്നിവരും പ്രധാന വേഷത്തിലെത്തി ‘ധൂം3’ക്ക് ശേഷം വിജയ് കൃഷ്ണ ആചാരി സംവിധാനം നിർവ്വഹിക്കുന്ന ചിത്രം കൂടിയാണ് ‘തഗ്‌സ് ഓഫ് ഹിന്ദോസ്ഥാൻ’.

1795 ലെ കഥ പറയുന്ന ആക്ഷൻ പിരീഡ് ചിത്രമായ ‘തഗ്‌സ് ഓഫ് ഹിന്ദോസ്ഥാൻ’, വ്യാപാരത്തിനായി ഈസ്റ്റ് ഇന്ത്യാ കമ്പനി ഇന്ത്യയിലേക്ക് വന്ന കാലഘട്ടമാണ് പറഞ്ഞത് . ഫിലിപ്പ് മെഡോസ് ടെയ്‌ലറുടെ നോവലായ ‘കൺഫെഷൻസ് ഓഫ് എ തംഗ് ആന്റ് ദ കൾട്ട് ഓഫ് ദ തഗ്ഗീ’ യെ ആസ്പദമാക്കി ഒരുങ്ങുന്ന ചിത്രമാണ് ‘തഗ്‌സ് ഓഫ് ഹിന്ദോസ്ഥാൻ’. കടൽകൊള്ളക്കാരനായ ഫിരംഗിയാണ് ആമിർ ചിത്രത്തിലെത്തിയത്. ചിത്രം പ്രതീക്ഷിച്ച വിജയം നേടിയില്ല.

Read More: അഭിനയിക്കുന്ന സിനിമകള്‍ വിജയിപ്പിക്കേണ്ടത് ഉത്തരവാദിത്തമായി കരുതുന്നു: ആമിര്‍ ഖാന്‍

Get Malayalam News and latest news update from India and around the world. Stay updated with today's latest Bollywood news in Malayalam at Indian Expresss Malayalam.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ