സിനിമയിൽ നായിക, സ്വന്തം വീട്, ഇപ്പോൾ ഡ്രീം കാറും; സൈബർ അറ്റാക്കിനെ മറികടന്ന് സ്വപ്നങ്ങൾ കയ്യെത്തി തൊട്ട ദിൽഷ

ബിഗ് ബോസ് മലയാളം നാലാം സീസണിന്റെ ടൈറ്റിൽ വിന്നറാണ് ദിൽഷ പ്രസന്നൻ. ബിഗ് ബോസ് മലയാളത്തിന്റെ ചരിത്രത്തിൽ ടൈറ്റിൽ വിന്നറായ ആദ്യത്തെ വനിത മത്സരാർത്ഥിയെന്ന വിശേഷണവും ദിൽഷയ്ക്ക് സ്വന്തം.

ബിഗ് ബോസ് വീട്ടിൽ നിന്നും പുറത്തിറങ്ങിയ ദിൽഷ വലിയ രീതിയിൽ സൈബർ ആക്രമണം നേരിടേണ്ടി വന്നിരുന്നു. റോബിൻ ആർമിയുടെ ഹേറ്റ് മുഴുവൻ ഏറ്റുവാങ്ങുകയായിരുന്നു ദിൽഷ.

എന്നാൽ, ഇന്ന് സ്വപ്നങ്ങൾ ഓരോന്നായി കയ്യെത്തി തൊടുകയാണ് ദിൽഷ. ബിഗ് ബോസിൽ നിന്നിറങ്ങിയതിനു പിന്നാലെ ദിൽഷ ഒരു വീട് സ്വന്തമാക്കിയിരുന്നു.

പിന്നാലെ, സിനിമയിലും അരങ്ങേറ്റം കുറിച്ചു. അനൂപ് മേനോൻ ചിത്രം  ഓ സിൻഡ്രെല്ലയിലൂടെയായിരുന്നു അരങ്ങേറ്റം. ദിൽഷ നായികയായ സീ ഓഫ് ലവ് എന്ന ചിത്രവും അടുത്തിടെ പുറത്തിറങ്ങിയിരുന്നു.

അടുത്തിടെ, സ്വപ്നവാഹനവും സ്വന്തമാക്കിയിരിക്കുകയാണ് ദിൽഷ. മഹീന്ദ്ര ഥാർ റോക്സ് ആണ് ദിൽഷ സ്വന്തമാക്കിയിരിക്കുന്നത്. ഏതാണ്ട് 25 ലക്ഷത്തോളമാണ് ഥാർ റോക്സിന്റെ ടോപ്പ് എൻഡ് മോഡലിന്റെ വില. കുടുംബത്തിനും സുഹൃത്തുക്കൾക്കുമൊപ്പം എത്തിയാണ് പുതിയ കാർ ദിൽഷ ഏറ്റുവാങ്ങിയത്.

ദിൽഷ പ്രസന്നൻ തന്റെ കലാജീവിതം ആരംഭിച്ചത് 2014-ൽ, ഡാൻസ് റിയാലിറ്റി പ്രോഗ്രാമായ D 4 ഡാൻസിലൂടെയാണ്. മികച്ച പ്രകടനങ്ങളിലൂടെ ശ്രദ്ധ നേടിയ ദിൽഷ, ആ സീസണിൽ അഞ്ചാം സ്ഥാനത്ത് എത്തി. എന്നാൽ ദിൽഷ പിന്മാറിയില്ല, തുടർന്ന് D 4 ഡാൻസ് റീലോഡഡ് എഡിഷനിൽ വീണ്ടും മത്സരിച്ചു വിജയിയായി കിരീടം നേടി.

ടെലിവിഷൻ ലോകത്തും ദിൽഷ തന്റെ കഴിവ് തെളിയിച്ചു. അവർ അഭിനയിച്ച കണാ കൺമണി (2016) എന്ന ടെലിവിഷൻ സീരിയൽ ഏറെ പ്രേക്ഷക പ്രശംസ നേടി. മികച്ച അഭിനയത്തിനുള്ള അംഗീകാരമായി 2016-ലെ ഏഷ്യാനെറ്റ് ടെലിവിഷൻ അവാർഡിൽ മികച്ച അഭിനേത്രി അവാർഡ് അവർക്ക് ലഭിച്ചു. 2017-ൽ, ദിൽഷ ഡെയർ ദി ഫിയർ എന്ന റിയാലിറ്റി ഷോയിൽ പങ്കെടുത്ത് ഫൈനൽ റൗണ്ടിൽ എത്തി, തൻ്റെ ധൈര്യവും ആത്മവിശ്വാസവും വീണ്ടും തെളിയിച്ചു. 2022 മാർച്ചിൽ, ദിൽഷ ജീവിതത്തിലെ മറ്റൊരു പ്രധാന ഘട്ടത്തിലേക്ക് കടന്നു — ബിഗ് ബോസ് മലയാളം സീസൺ 4-ലൂടെ. പതിനാലാഴ്ച നീണ്ട മത്സരത്തിനുശേഷം, അവർ വിജയിയായി കിരീടം നേടി. ഇതോടെ ബിഗ് ബോസ് മലയാളം ചരിത്രത്തിൽ കിരീടം നേടുന്ന ആദ്യ വനിതാ മത്സരാർത്ഥിയായി ദിൽഷ പ്രസന്നൻ മാറി. തൻ്റെ കഠിനാധ്വാനവും പ്രതിഭയും മുഖേന, ഡാൻസറായും അഭിനേത്രിയായും റിയാലിറ്റി ഷോ വിജയിയായും ദിൽഷ മലയാളി പ്രേക്ഷകരുടെ മനസിൽ സ്ഥാനമുറപ്പിച്ചു.