ബേസിലിനെ എടുത്തു വച്ചതു പോലുണ്ട്; മകളെ കുറിച്ച് ആരാധകർ

ഫെബ്രുവരി 15നാണ് ബേസിൽ ജോസഫിനും ഭാര്യ എലിസബത്തിനും പെൺകുഞ്ഞ് പിറന്നത്. സോഷ്യൽ മീഡിയയിലൂടെയാണ് താരം ആരാധകരെ സന്തോഷ വാർത്ത അറിയിച്ചത്. 'ഹോപ് എലിസബത്ത് ബേസിൽ' എന്നാണ് മകളുടെ പേര്.

കുറച്ച് ദിവസങ്ങൾക്കു മുൻപ് മകളുടെ മാമോദീസ ചടങ്ങിന്റെ ചിത്രം ബേസിൽ പങ്കുവച്ചിരുന്നു . കുടുംബാംഗങ്ങൾ മാത്രമുള്ള ചടങ്ങായിരുന്നെന്നാണ് വീഡിയോയിൽ നിന്ന് വ്യക്തമാകുന്നത്. പ്രിയപ്പെട്ടവർക്കൊപ്പം നിന്ന് സന്തോഷം പങ്കിടുന്ന ബേസിലിനെയും ഭാര്യയെയും വീഡിയോയിൽ കാണാം.

ഇപ്പോഴിതാ മകൾക്കും ഭാര്യയ്ക്കുമൊപ്പം ഗോവയിലേക്ക് ട്രിപ്പ് പോയിരിക്കുകയാണ് ബേസിൽ. 'എന്റെ പെണ്ണുങ്ങൾ' എന്ന അടികുറിപ്പ് നൽകി ഇരുവരുടെയും ചിത്രവും ബേസിൽ പങ്കുവച്ചു. വളരെ ക്യൂട്ടായ ചിത്രത്തിനു താഴെ അനവധി കമന്റുകളും നിറയുന്നുണ്ട്. മകൾ കാണാൻ ബേസിലിനെ പോലെ തന്നെയുണ്ടെന്നാണ് ഭൂരിഭാഗം ആളുകളും പറയുന്നത്. താരങ്ങളായ അജു വർഗ്ഗീസ്, മഞ്ജു പിള്ള, അപർണ ദാസ്, അർച്ചന കവി, വിനയ് ഫോർട്ട് എന്നിവരും ചിത്രത്തിനു താഴെ കമന്റ് ചെയ്തിട്ടുണ്ട്.

"ഞങ്ങളുടെ കുഞ്ഞു മാലാഖ ഹോപ് എലിസബത്ത് ബേസിലിന്റെ വരവ് സന്തോഷത്തോടെ അറിയിക്കുന്നു. ഇതിനകം തന്നെ അവൾ ഞങ്ങളുടെ ഹൃദയം കവർന്നു കഴിഞ്ഞു. അവൾ വളരുന്നതും അവളിൽ നിന്ന് ഓരോ ദിവസവും പുതിയ കാര്യങ്ങൾ പഠിക്കുന്നതും കാണാൻ ഞങ്ങൾക്ക് കാത്തിരിക്കാനാവില്ല"ബേസിൽ കുറിച്ചതിങ്ങനെ. കുഞ്ഞിനും ഭാര്യ എലിസബത്തിനുമൊപ്പമുള്ള ചിത്രവും ബേസിൽ പങ്കുവച്ചിരുന്നു.

മകൾക്കു ഹോപ്പ് എന്നു പേര് നൽകാനുള്ള കാരണവും ബേസിൽ വ്യക്തമാക്കിയിരുന്നു. താരത്തിന്റെ ഭാര്യ എലിസബത്ത് ആണ് പേര് നൽകിയതെന്ന് ബേസിൽ പറയുന്നു. "ഒരു സീരീസ് കാണുന്നതിനിടയിലാണ് എലിസബത്തിന് ഹോപ്പ് എന്ന പേര് സ്ട്രൈക്ക് ചെയ്യുന്നത്. ആ സീരീസിൽ ഒരു പട്ടിക്കുട്ടി ജനിക്കുന്നുണ്ട്, അതിനു നൽകുന്ന പേരാണ് ഹോപ്പ് എന്നത്. വളരെ പ്രശ്നങ്ങൾക്കിടയിൽ അവർക്ക് പ്രതീക്ഷകൾ നൽകി ജനിക്കുന്ന കുഞ്ഞിനെ അവർ ഹോപ്പ് എന്ന് വിളിച്ചു" ബേസിലിന്റെ വാക്കുകളിങ്ങനെ.

2017 ലായിരുന്നു ബേസിലിന്റെയും എലിസബത്തിന്റെയും വിവാഹം. തിരുവനന്തപുരം എൻജിനീയറിങ് കോളേജില്‍ വച്ചാണ് ഇരുവരും കണ്ടുമുട്ടിയത്. മുഹഷിന്റെ സംവിധാനത്തിൽ ഒരുങ്ങിയ 'കഠിന കഠോരമീ അണ്ഡകടാഹം' ആണ് ബേസിലിന്റെ അവസാനം റിലീസിനെത്തിയ ചിത്രം.