ഭായ്ജാന്റെ മുന്നി ഇത്ര വലുതായോ? ഹർഷാലിയുടെ ചിത്രങ്ങൾ വൈറൽ

ബോളിവുഡ് ചിത്രം 'ഭജ് രംഗി ഭായ്ജാൻ' കണ്ടവരാരും മുന്നിയെ മറക്കില്ല. പാക്കിസ്ഥാനിൽ നിന്നും വഴിതെറ്റി ഇന്ത്യയിലെത്തി പോവുന്ന, സംസാരശേഷിയില്ലാത്ത മുന്നിയായി ഗംഭീര പ്രകടനമാണ് ആ ബാലതാരം കാഴ്ച വച്ചത്.

ഹർഷാലി മൽഹോത്ര എന്ന ഏഴുവയസ്സുകാരിയാണ് മുന്നിയെ മറക്കാനാവാത്ത രീതിയിൽ അവതരിപ്പിച്ചത്.

സൽമാന്റെ ഭായ്ജാനും ഹർഷാലിയുടെ മുന്നിയും അവരുടെ കൂട്ടുക്കെട്ടുമെല്ലാം പ്രേക്ഷകലക്ഷങ്ങളുടെ ഇഷ്ടം കവർന്നു.

10 വർഷങ്ങൾക്കിപ്പുറം മുന്നി വളർന്നു വലിയ പെൺകുട്ടിയായിരിക്കുകയാണ്. ഹർഷാലിയുടെ പുതിയ ചിത്രങ്ങളാണ് ഇപ്പോൾ സമൂഹമാധ്യമങ്ങളുടെ ശ്രദ്ധ നേടുന്നത്.

'ഭജ് രംഗി ഭായ്ജാൻ' എന്ന സിനിമയിലെ അഭിനയത്തിന് മികച്ച പുതുമുഖതാരത്തിനുള്ള ഫിലിംഫെയർ പുരസ്‌കാരത്തിനും ഹർഷാലി നോമിനേറ്റ് ചെയ്യപ്പെട്ടിരുന്നു. ആ വിഭാഗത്തിൽ നോമിനേറ്റ് ചെയ്യപ്പെടുന്ന ഏറ്റവും പ്രായംകുറഞ്ഞയാൾ എന്ന വിശേഷണവും ഹർഷാലിയ്ക്ക് സ്വന്തം.

ഇപ്പോഴിതാ 10 വർഷങ്ങൾക്കുശേഷം അഭിനയത്തിലേക്ക് തിരിച്ചെത്തുകയാണ് ഹർഷാലി. നന്ദമൂരി ബാലകൃഷ്ണ, സംയുക്ത എന്നിവർ പ്രധാന കഥാപാത്രങ്ങളെ അവതരിപ്പിക്കുന്ന തെലുഗുചിത്രമായ 'അഖണ്ഡ 2'ലാണ് ഹർഷാലി അഭിനയിക്കുന്നത്.

ആറാം വയസ്സിലാണ് ഹർഷാലി അഭിനയരംഗത്ത് എത്തിയത്. സീരിയലുകളിലൂടെയായിരുന്നു തുടക്കം. ഖുബൂൽ ഹെ, ലൗട്ട് ആവോ ത്രിഷ എന്നീ സീരിയലുകളിൽ ഹർഷാലി അഭിനയിച്ചു.

'ഭജ് രംഗി ഭായ്ജാനു'ശേഷം അഭിനയത്തിൽ നിന്നും ഇടവേളയെടുത്ത ഹർഷാലി പഠനവുമായി മുന്നോട്ട് പോയി. ഇപ്പോൾ പഠനം പൂർത്തിയാക്കിയതിനുശേഷം വീണ്ടും സിനിമയിലേക്ക് എത്തിയിരിക്കുകയാണ് ഈ കൊച്ചുമിടുക്കി.