അനൂപ് മേനോന് ദിൽഷ നായിക; വൈറലായി ‘ഓ സിൻഡ്രെല്ല’ടീസർ

നടൻ അനൂപ് സംവിധാനത്തിൽ ഒരുങ്ങുന്ന ചിത്രത്തിൽ ബിഗ് ബോസ് വിജയി ദിൽഷ നായികയാകുന്നു എന്ന വാർത്ത കുറച്ച് മാസങ്ങൾക്ക് മുൻപ് പുറത്തുവന്നിരുന്നു. ഇപ്പോഴിതാ ചിത്രത്തിന്റെ ആദ്യ ടീസറും റിലീസ് ചെയ്തിരിക്കുന്നത്. ‘ഓ സിൻഡ്രെല്ല' എന്നാണ് ചിത്രത്തിന്റെ പേര്. നർത്തകി കൂടിയായ ദിൽഷ ചിത്രത്തിലും ഒരു ഡാൻസറായി തന്നെയായിരിക്കും വേഷമിടുന്നതെന്ന സൂചനകളും ടീസർ നൽകുന്നുണ്ട്.

അനൂപ് മേനോൻ സ്റ്റോറീസ് അവതരിപ്പിക്കുന്ന ചിത്രത്തിൽ അജു വർ​ഗീസും അനൂപ് മേനോനും പ്രധാന വേഷങ്ങളിലെത്തുന്നു. ” എന്റെ അരങ്ങേറ്റ ചിത്രം, ഓ സിൻഡ്രെല്ല. എല്ലാറ്റിനും ആദ്യം ഞാൻ ദൈവത്തോട് നന്ദി പറയുന്നു. ഒപ്പം എന്നെ ഈ ഇൻഡസ്ട്രിയിലേക്ക് സ്വാഗതം ചെയ്തതിന് മഹാദേവൻ തമ്പി ചേട്ടന് നന്ദി. ഈ മനോഹരമായ ഓപ്പണിംഗിന് അനൂപ് ഏട്ടനും നന്ദി. എന്നെ വിശ്വസിച്ചതിനും മുന്നോട്ടു നയിച്ചതിനും നന്ദി. നിങ്ങളൊരു അത്ഭുത മനുഷ്യനാണ്. എല്ലാവരുടെയും പിന്തുണയും വേണം”, എന്നാണ് ദില്‍ഷ സിനിമ അരങ്ങേറ്റത്തെ കുറിച്ച് പറഞ്ഞത്.

മലയാളം ബിഗ് ബോസിന്റെ ചരിത്രത്തിൽ ആദ്യമായി ടൈറ്റിൽ വിന്നറായ വനിതാ മത്സരാർത്ഥി എന്ന വിശേഷണവും ദിൽഷയ്ക്ക് സ്വന്തമാണ്.

മഴവില്‍ മനോരമയില്‍ സംപ്രേഷണം ചെയ്ത ഡിഫോര്‍ ഡാന്‍സ് എന്ന പരിപാടിയിലൂടെയാണ് ദില്‍ഷ ശ്രദ്ധിക്കപ്പെട്ടത്. ഏഷ്യാനെറ്റിലെ ഡാന്‍സിംഗ് സ്റ്റാര്‍സ് എന്ന റിയാലിറ്റി ഷോയുടെയും ഭാഗമായിരുന്നു ദിൽഷ.