കൊച്ചി: സംസ്ഥാന ചലച്ചിത്ര അവാര്‍ഡ് ദാന ചടങ്ങിനിടെ വേദിയിലേക്ക് തോക്ക് ചൂണ്ടുന്ന തരത്തിലേക്ക് ആംഗ്യം കാണിച്ച സംഭവത്തില്‍ നടന്‍ അലന്‍സിയറോട് താര സംഘടനയായ അമ്മ വിശദീകരണം ചോദിക്കും. മുഖ്യാതിഥിയായ മോഹന്‍ലാല്‍ ചടങ്ങില്‍ സംസാരിക്കവെയായിരുന്നു അലന്‍സിയര്‍ തോക്ക് ചൂണ്ടുന്ന പോലെ ആംഗ്യം കാണിച്ചത്.

തൊണ്ടിമുതലും ദൃക്‌സാക്ഷിയും എന്ന ചിത്രത്തിലെ അഭിനയത്തിന് മികച്ച സ്വഭാവനടനുള്ള പുരസ്‌കാരം ഏറ്റുവാങ്ങാനെത്തിയതായിരുന്നു അലന്‍സിയര്‍. തന്നെ ചടങ്ങിലെ മുഖ്യാതിഥിയായി ക്ഷണിക്കുന്നതുമായി ബന്ധപ്പെട്ട വിവാദങ്ങള്‍ക്ക് മറുപടി നല്‍കി കൊണ്ട് മോഹന്‍ലാല്‍ സംസാരിക്കുന്നതിനിടെയാണ് സദസില്‍ നിന്നും എഴുന്നേറ്റ് നിന്ന് അലന്‍സിയര്‍ ആംഗ്യം കാണിച്ചത്.

പിന്നാലെ സംഭവം വിവാദമാവുകയും ചെയ്തിരുന്നു. മോഹന്‍ലാല്‍ ഫാന്‍സില്‍ ചിലര്‍ സംഭവത്തില്‍ അലന്‍സിയറിനെതതിരെ രംഗത്തെത്തിയിരുന്നു. എന്നാല്‍ താന്‍ മോഹന്‍ലാലിനെതിരെ തോക്ക് ചൂണ്ടിയതല്ലെന്നും തന്റെ ആംഗ്യത്തെ ദുര്‍വ്യാഖ്യാനം ചെയ്താണെന്നുമായിരുന്നു പിന്നീട് അലന്‍സിയര്‍ പറഞ്ഞത്. ഈ സാഹചര്യത്തിലാണ് അലന്‍സിയറോട് അമ്മ വിശദീകരണം ചോദിച്ചത്.

സംസ്ഥാന ചലച്ചിത്ര അവാര്‍ഡ് ദാന ചടങ്ങിലേക്ക് തന്നെ ആരും ക്ഷണിക്കേണ്ടതില്ലെന്നും കഴിഞ്ഞ കുറേ വര്‍ഷങ്ങളായി നിങ്ങളുടെ ഇടയില്‍ പ്രവര്‍ത്തിക്കുന്ന ആളെന്ന നിലയിലാണ് ചടങ്ങിന് എത്തിയതെന്നുമായിരുന്നു വിവാദങ്ങളോടുള്ള മോഹന്‍ലാലിന്റെ പ്രതികരണം. പുരസ്‌കാര ദാന വേദിയില്‍ സംസാരിക്കവെയാണ് അദ്ദേഹം മറുപടി നല്‍കിയത്.

Get all the Latest Malayalam News and Kerala News at Indian Express Malayalam. You can also catch all the Entertainment News in Malayalam by following us on Twitter and Facebook