സീക്രട്ട് അക്കൗണ്ടിലൂടെ നീയിത് വായിക്കുമെന്നറിയാം; രൺബീറിനോട് ആലിയയ്ക്ക് പറയാനുള്ളത്

ബോളിവുഡിന്റെ പ്രിയപ്പെട്ട താരദമ്പതികളാണ് ആലിയ ഭട്ടും രൺബീർ കപൂറും. രൺബീറിന്റെ ജന്മദിനം ആഘോഷപൂർവ്വമാണ് കുടുംബവും ആരാധകരും ആഘോഷിച്ചത്. പിറന്നാൾ ദിനത്തിൽ രൺബീറിന്റെ ചിത്രങ്ങൾ ഷെയർ ചെയ്ത് ആലിയ കുറിച്ച വാക്കുകളാണ് ഇപ്പോൾ ശ്രദ്ധ നേടുന്നത്.

"എന്റെ പ്രണയം… എന്റെ ബെസ്റ്റ് ഫ്രണ്ട്… എന്റെ ഹാപ്പി പ്ലെയ്സ്…ഇതെല്ലാം എന്റെ തൊട്ടടുത്തിരുന്ന് സീക്രട്ട് അക്കൗണ്ടിലൂടെ നിങ്ങൾ വായിക്കുമ്പോൾ എനിക്കു പറയാനുള്ളത്
'നീ എല്ലാം മാന്ത്രികമാക്കുന്നു' എന്നാണ്. ജന്മദിനാശംസകൾ ബേബി…," എന്നാണ് ആലിയ കുറിക്കുന്നത്.

2022 ഏപ്രിലിലായിരുന്നു ആലിയയും രൺബീർ കപൂറും തമ്മിലുള്ള വിവാഹം. അഞ്ചുവർഷത്തെ പ്രണയം വിവാഹത്തിലെത്തിക്കുകയായിരുന്നു ഇരുവരും. വിവാഹത്തിന് തൊട്ടു പിന്നാലെ, താൻ ഗർഭിണിയാണെന്ന് ആലിയ പ്രഖ്യാപിച്ചത് ആരാധകർക്ക് വലിയ സർപ്രൈസ് ആയിരുന്നു.

രണ്‍ബീറിന് സോഷ്യല്‍ മീഡിയയില്‍ രഹസ്യ അക്കൗണ്ടുണ്ടോ എന്നാണ് ആരാധകർ തിരക്കുന്നത്.

2022 നവംബർ ആറിനാണ് ഇരുവർക്കും മകൾ പിറന്നത്. മുംബൈയിലെ ഗിർഗാവിലെ എച്ച്എൻ റിലയൻസ് ഹോസ്പിറ്റലിലായിരുന്നു കുഞ്ഞിന്റെ ജനനം. റാഹ എന്നാണ് മകൾക്ക് താരദമ്പതികൾ പേരു നൽകിയത്. സമാധാനം, സ്വാതന്ത്ര്യം, സന്തോഷം എന്നൊക്കെയാണ് പല ഭാഷകളിലായി 'റാഹ' എന്നതിന്റെ അർത്ഥം. കുഞ്ഞിന്റെ മുത്തശ്ശിയാണ് പേര് കണ്ടുപിടിച്ചതെന്നും ആലിയ പറഞ്ഞിരുന്നു.

വിവാഹത്തിന് ശേഷം ആലിയയും രൺബീറും മുംബൈയിലെ വാസ്തു പാലി ഹിൽ അപ്പാർട്ട്മെന്റിലാണ് താമസം. പ്രശസ്‌ത ഡിസൈനറും ബോളിവുഡ് താരം ഷാരൂഖ് ഖാന്റെ ഭാര്യയുമായ ഗൗരി ഖാനാണ് ചാരുതയും പ്രൗഢിയും നിറഞ്ഞ ഈ ആഢംബര വീട് രൂപകൽപ്പന ചെയ്‌തിരിക്കുന്നത്.