'അതേടാ, മലയാളം പറയാൻ നന്നായിട്ടറിയാം'; ഫെയ്സ്ബുക്ക് 'ആങ്ങള'മാരോട് അഹാന

മമ്മൂട്ടി ചിത്രം കസബയിലെ സ്ത്രീവിരുദ്ധ​ പരാമർശത്തെ ചൂണ്ടിക്കാട്ടിയതിന്റെ പേരിൽ നടി പാർവ്വതി നേരിട്ട സൈബർ ആക്രമണം ഇപ്പോളും മലയാളികൾ മറന്നു കാണില്ല. നമുക്കിഷ്ടപ്പെടാത്ത ഒരു അഭിപ്രായം ആരെങ്കിലും പറഞ്ഞാൽ, നമ്മുടെ പ്രിയതാരത്തെ ആരെങ്കിലും വിമർശിച്ചാൽ, നമ്മുടെ ആരാധനാപാത്രത്തിന്റെ സിനിമ ഇഷ്ടപ്പെട്ടില്ലെന്ന് ആരെങ്കിലും പറഞ്ഞാൽ, അവരെ കീഴ്മേൽ നോക്കാതെ അസഭ്യം പറയുകയും, അവരുടെ സോഷ്യൽ മീഡിയ പോസ്റ്റുകൾക്ക് കീഴെ 'പൊങ്കാല' നടത്തുകയും ചെയ്യുന്ന അപകടകരമായ പ്രവണത ഈ സമൂഹത്തിൽ നിലനിൽക്കുന്നുണ്ട്.

"ശനിയാഴ്ച ഒരു രാഷ്ട്രീയ അഴിമതിയെ കുറിച്ച് വാർത്ത വന്നെന്നും ഞായറാഴ്ച തിരുവനന്തപുരത്ത് ലോക്ക്ഡൗൺ പ്രഖ്യാപിച്ചെ"ന്നും പറഞ്ഞുകൊണ്ട് നടി അഹാന ഇൻസ്റ്റഗ്രാമിൽ കുറിച്ച വാക്കുകൾ വലിയ വിവാദത്തിന് ഇടവച്ചിരുന്നു. തിരുവനന്തപുരത്ത് ട്രിപ്പിള്‍ ലോക്ക്ഡൗണ്‍ പ്രഖ്യാപിച്ചത് സ്വര്‍ണ കള്ളക്കടത്ത് കേസിൽ നിന്നുള്ള ശ്രദ്ധ തിരിക്കാനാണെന്ന് നടി പറയാതെ പറയുകയായിരുന്നുവെന്ന് വിമർശനം ഉയർന്നിരുന്നു.

Read More: വായില്‍ തോന്നുന്നത് വിളിച്ച് പറയരുത്; ആരോപണം അംഗീകരിക്കില്ലെന്ന് അഹാന

ഇതിന്റെ പശ്ചാത്തലത്തിൽ മാന്യമായ ഭാഷയിൽ പലരും അഹാനയുടെ അഭിപ്രായത്തോട് വിയോജിപ്പ് രേഖപ്പെടുത്തിയപ്പോൾ, വളരെ മോശമായ ഭാഷയിൽ അവരെ അസഭ്യം പറയുകയും വിമർശിക്കുകയും, അവരുടെ സോഷ്യൽ മീഡിയ പോസ്റ്റിന് താഴെ കേട്ടാലറയ്ക്കുന്ന കമന്റുകൾ പോസ്റ്റ് ചെയ്യുകയും ചെയ്തിരുന്നു. ഈ സോഷ്യൽ മീഡിയ ആക്രമണത്തോട് രസകരമായ പ്രതികരണമാണ് അഹാന നടത്തുന്നത്.

'എ ലൗവ് ലെറ്റർ ടു സെെബർ ബൂള്ളീസ്' എന്നാണ് വീഡിയോയ്ക്ക് പേരിട്ടിരിക്കുന്നത്. താൻ നേരിട്ട സൈബർ ആക്രമണത്തിനുള്ള പ്രതികരണമോ മറുപടിയോ അല്ല ഇതിലൂടെ ഉദ്ദേശിക്കുന്നതെന്ന് അഹാന പറയുന്നു. താനൊരു ഇരയല്ലെന്നും മോശം വാക്കുകൾ ഉപയോ​ഗിച്ച് തന്നെ ആക്രമിച്ചവർ സ്വയം ല‍ജ്ജിക്കണമെന്നും അഹാന കൂട്ടിച്ചേർത്തു.

ഒരു മൊബൈൽ ഫോണും ആവശ്യത്തിലധികം സമയവും, മറ്റൊരാളോട് അവരെ കുറിച്ച് തന്നെ വളരെ മോശമായി പറയുമ്പോൾ സന്തോഷം ലഭിക്കുകയും ചെയ്യുന്ന ആളാണ് നിങ്ങൾ എങ്കിൽ നിങ്ങളും ഒരു സൈബർ അറ്റാക്കർ ആണെന്ന് അഹാന പറയുന്നു.

നിങ്ങൾ ഇത്തരത്തിൽ കമന്റുകൾ ഇടുമ്പോൾ അത് നിങ്ങൾ ആരാണെന്നും നിങ്ങളുടെ വ്യക്തിത്വം എന്താണെന്നുമാണ് കാണിക്കുന്നത്. എന്റെ വീട്ടുകാരെയല്ല, നിങ്ങളുടെ വീട്ടുകാരെയാണ് അത് പരിഹസിക്കുന്നത്. എനിക്കല്ല, നിങ്ങൾക്കാണ് വളർത്ത് ദോഷം. നിങ്ങളുടെ കമന്റിന് 250 ലൈക്ക് കിട്ടിയെങ്കിൽ ഈ ലോകത്ത് 250 സൈബർ അറ്റാക്കർമാർ കൂടിയുണ്ടെന്നാണ് അതിന് അർഥം എന്നും അഹാന പറയുന്നു.

ഇനി തന്റെ ഈ വീഡിയോ കാണുമ്പോൾ, പറഞ്ഞ കാര്യങ്ങൾ ഒന്നും പോലും മനസിലാക്കാതെ "അപ്പോൾ ഇവൾക്ക് മലയാളം പറയാൻ അറിയാം" എന്നാണ് നിങ്ങൾ കരുതുന്നതെങ്കിൽ, "ആ, അതേടാ, മലയാളം പറയാൻ നന്നായിട്ടറിയാം," എന്നു പറഞ്ഞുകൊണ്ടാണ് അഹാന വീഡിയോ അവസാനിപ്പിക്കുന്നത്.