പ്രിയകൂട്ടുകാരിയുടെ വിവാഹവേദിയിൽ തകർപ്പൻ ഡാൻസുമായി അഹാന; വീഡിയോ

നടി, യൂട്യൂബർ എന്നീ നിലകളിലെല്ലാം സുപരിചിതയായ താരമാണ് അഹാന കൃഷ്ണ. പ്രിയപ്പെട്ടവർക്കായി സർപ്രൈസ് ഒരുക്കാനും എന്നെന്നും ഓർക്കാവുന്ന മനോഹരമായ നിമിഷങ്ങൾ സമ്മാനിക്കാനുമൊക്കെ എപ്പോഴും അഹാന സമയം കണ്ടെത്താറുണ്ട്. അത്തരത്തിലുള്ള അഹാനയുടെ വ്ളോഗുകൾ പലപ്പോഴും വൈറലാവാറുമുണ്ട്.

അഹാനയുടെ അടുത്ത സുഹൃത്തുക്കളാണ് അഭിനേതാക്കളായ നൂറിൻ ഷെറീഫ്, ഫാഹിം സഫർ എന്നിവർ. തിങ്കളാഴ്ചയായിരുന്നു നൂറിനും ഫാഹിമും തമ്മിലുള്ള വിവാഹം നടന്നത്. സൗഹൃദക്കൂട്ടിലെ രണ്ടു ഇണക്കുരുവികൾ ജീവിതത്തിലും ഒന്നിച്ചപ്പോൾ ആ വിവാഹവേദി അഹാനയ്ക്കും ഏറെ പ്രിയപ്പെട്ട ഒന്നായി മാറുകയായിരുന്നു.

പ്രിയ കൂട്ടുകാരുടെ വിവാഹ റിസപ്ഷന് ചുവടുവയ്ക്കുന്ന അഹാനയുടെ ഒരു വീഡിയോ ആണ് ഇപ്പോൾ സോഷ്യൽ മീഡിയയുടെ ശ്രദ്ധ കവരുന്നത്. കൂട്ടുകാരായ റിയ, അമിത് മോഹൻ എന്നിവരും അഹാനയ്ക്ക് ഒപ്പമുണ്ട്. തിരുടാ തിരുടി എന്ന ചിത്രത്തിലെ മന്‍മദരാസ എന്ന ഗാനത്തിന് ഒപ്പമാണ് മൂവരും ചുവടുവയ്ക്കുന്നത്.

നടി നൂറിൻ ഷെരീഫിനും നടനും തിരക്കഥാകൃത്തുമായ ഫഹീം സഫറിനും ഏറെ നാളത്തെ പ്രണയസാക്ഷാത്കാരം കൂടിയാണ് വിവാഹം. അഹാനയെ കൂടാതെ രജിഷ വിജയൻ, പ്രിയ വാര്യർ, നിരഞ്ജന അനൂപ് എന്നിവരും വിവാഹത്തിനായി എത്തിച്ചേർന്നിരുന്നു.

ഒമർ ലുലു സംവിധാനം ചെയ്ത 2017ൽ പുറത്തിറങ്ങിയ 'ചങ്ക്‌സ്' എന്ന ചിത്രത്തിലൂടെയായിരുന്നു നൂറിന്റെ അരങ്ങേറ്റം. ചിത്രത്തിൽ ബാലു വർഗീസിന്റെ സഹോദരിയുടെ വേഷമാണ് നൂറിൻ അവതരിപ്പിച്ചത്. പിന്നീട് ഒമർ ലുലു തന്നെ സംവിധാനം ചെയ്ത 'ഒരു അഡാർ ലവ്' എന്ന ചിത്രത്തിൽ ഗാദാ ജോൺ എന്ന കഥാപാത്രത്തെ അവതരിപ്പിച്ചു. ഈ ചിത്രമാണ് നൂറിനെ ഏറെ ശ്രദ്ധേയയാക്കിയത്. ധമാക്ക, വിധി എന്നിവയാണ് നൂറിന്റെ മറ്റു പ്രധാന ചിത്രങ്ങൾ.

മലയാളസിനിമയിൽ തിരക്കഥാകൃത്തും അഭിനേതാവുമായി ശ്രദ്ധ നേടുകയാണ് ഫാഹിം സഫർ. അഹമ്മദ് കബീര്‍ സംവിധാനം ചെയ്ത 'മധുരം' എന്ന ചിത്രത്തിന്റെ തിരക്കഥയും ഫാഹിമിന്റെതായിരുന്നു. പതിനെട്ടാം പടി, ജൂണ്‍, ത്രിശങ്കു തുടങ്ങിയ ചിത്രങ്ങളിലും ഫാഹിം അഭിനയിച്ചിട്ടുണ്ട്.