നടി അഭിനയ വിവാഹിതയാകുന്നു; വിവാഹം ഏപ്രിലിൽ

ജോജു ജോർജ് സംവിധാനം ചെയ്ത പണി എന്ന ചിത്രത്തിലൂടെ മലയാളി പ്രേക്ഷകരുടെ ഇഷ്ടം കവർന്ന നടി അഭിനയ വിവാഹിതയാവുന്നു.

അഭിനയ തന്നെയാണ് വിവാഹനിശ്ചയം കഴിഞ്ഞുവെന്ന വിശേഷം സമൂഹമാധ്യമങ്ങളിലൂടെ ആരാധകരുമായി പങ്കുവെച്ചത്. പ്രതിശ്രുത വരനൊപ്പം ക്ഷേത്രത്തിലെ മണി മുഴക്കുന്ന ചിത്രമാണ് താരം പങ്കുവച്ചിരിക്കുന്നത്. വരന്റെ പേരോ മുഖം വ്യക്തമായി കാണുന്ന ചിത്രമോ അഭിനയ ഇതുവരെ വെളിപ്പെടുത്തിയിട്ടില്ല.

സിനിമയിൽ നിന്നുള്ള വ്യക്തിയല്ല അഭിനയയുടെ വരൻ എന്നാണ് അറിയാൻ കഴിഞ്ഞത്. അഭിനയയുടെ കുട്ടിക്കാലം മുതലുള്ള സുഹൃത്താണ് വരൻ. കഴിഞ്ഞ പതിനഞ്ച് വർഷം നീണ്ട സൗഹൃദവും പ്രണയവുമാണ് ഇപ്പോള്‍ വിവാഹത്തിലെത്തി നിൽക്കുന്നത്. 2025 ഏപ്രിൽ മാസത്തിലാവും വിവാഹം എന്നും താരത്തോട് അടുത്ത വൃത്തങ്ങൾ പറയുന്നു.

18 വർഷത്തിനിടയിൽ തമിഴ്, തെലുങ്ക്, കന്നഡ, ഹിന്ദി, മലയാളം ഭാഷകളിലായി 58 ഓളം ചിത്രങ്ങൾ അഭിനയ ഇതിനകം പൂർത്തിയാക്കി. നാടോടികളാണ് ആദ്യം ബ്രേക്ക് സമ്മാനിച്ച ചിത്രം.

ഐസക് ന്യൂട്ടൺ S/O ഫിലിപ്പോസ് എന്ന ചിത്രത്തിലൂടെയാണ് താരം മലയാളം സിനിമയിലെത്തിയത്. മലയാളത്തിൽ ഇതിനകം അഞ്ചു ചിത്രങ്ങളിൽ അഭിനയ അഭിനയിച്ചു കഴിഞ്ഞു.

കല കൊണ്ട് എല്ലാ പരിമിതികളെയും മറികടന്ന പെൺകുട്ടിയാണ് അഭിനയ. കേൾവിയോ സംസാരശേഷിയോ ഇല്ലാത്ത അഭിനയ, കഥാപാത്രത്തിന്റെ ഉള്ളുതൊട്ടറിഞ്ഞു അഭിനയിക്കുന്നത് കാണുമ്പോൾ പ്രേക്ഷകർക്കും വിസ്മയമാണ് ഈ പെൺകുട്ടി.

തന്റെ ഡഫ് കമ്മ്യൂണിറ്റിയ്ക്ക് ഒരു മോഡൽ സെറ്റ് ചെയ്യണമെന്നുണ്ട് എന്നാണ് ഇന്ത്യൻ എക്സ്പ്രസ് മലയാളത്തിനു നൽകിയ അഭിമുഖത്തിൽ മുൻപു അഭിനയ പറഞ്ഞത്. "നമുക്കു ചുറ്റും ഡഫ് ആയിട്ടുള്ള, ടാലന്റഡായിട്ടുള്ള ഒരുപാട് പേരുണ്ട്. അവരെന്നെ കാണുമ്പോൾ മോട്ടിവേറ്റ് ആവും, തിരിച്ച് അവരിൽ നിന്നു ഞാനും മോട്ടിവേഷൻ എടുക്കാറുണ്ട്. കേൾവിയുള്ള ഒരാൾക്കേ നല്ല കഥാപാത്രങ്ങളെ ചെയ്യാൻ പറ്റൂ, അവർക്കേ അഭിനയിക്കാൻ പറ്റൂ, ഡഫ് ആയ ആൾക്ക് പറ്റില്ല എന്നൊന്നുമില്ല. ഡഫ് ആണെങ്കിലും കേൾവിയുണ്ടെങ്കിലും ഈക്വൽ ആണ്. നമ്മുടെ ടാലന്റും സ്കില്ലും മാത്രമാണ് ഇവിടെ പ്രധാനം. ആ ഒരു കാര്യത്തിൽ ഞാൻ സെൽഫ് മോട്ടിവേറ്റഡ് ആവാറുണ്ട്. എന്റെ ഈ ഡഫ് കമ്മ്യൂണിറ്റിയ്ക്ക് വേണ്ടി ഞാനൊരു മോഡൽ സെറ്റ് ചെയ്യണമെന്നും, അതുവഴി അവരുടെ കോൺഫിഡൻസും ബൂസ്റ്റ് ചെയ്യാൻ പറ്റണമെന്നും ആഗ്രഹിക്കാറുണ്ട്."