scorecardresearch

‘ഞാനല്ലെങ്കിൽ മറ്റൊരാൾ ഇത് ചെയ്യണ്ടേ’; ടോയ്ലറ്റ് ക്‌ളീനിംഗ് ജോലിയിൽ നിയമനം നേടി നടൻ ഉണ്ണി രാജൻ

തൊണ്ടിമുതലും ദൃക്സാക്ഷിയും, ഓപ്പറേഷൻ ജാവ തുടങ്ങിയ സിനിമകളിലൂടെയും ‘മറിമായം’ എന്ന ടെലിവിഷൻ പാരമ്പരയിലൂടെയും ശ്രദ്ധനേടിയ നടനാണ് ഉണ്ണി രാജൻ

‘ഞാനല്ലെങ്കിൽ മറ്റൊരാൾ ഇത് ചെയ്യണ്ടേ’; ടോയ്ലറ്റ് ക്‌ളീനിംഗ് ജോലിയിൽ നിയമനം നേടി നടൻ ഉണ്ണി രാജൻ
Photo: facebook/ഉണ്ണിരാജ്

സിനിമകളിലും സീരിയലുകളിലും ചെറിയ വേഷങ്ങളിൽ അഭിനയിക്കുന്നവരുടെ ജീവിതം അത്ര നിറമുള്ളതായിരിക്കില്ല. സ്ഥിരവരുമാനമില്ലാത്തതിന്റെ കഷ്ടതകൾ അവർ ധാരാളം അനുഭുവിക്കുന്നുണ്ടാകും. അവരിൽ ഒരാളാണ് നടൻ ഉണ്ണി രാജനും.

തൊണ്ടിമുതലും ദൃക്സാക്ഷിയും, ഓപ്പറേഷൻ ജാവ തുടങ്ങിയ സിനിമകളിലൂടെയും ‘മറിമായം’ എന്ന ടെലിവിഷൻ പാരമ്പരയിലൂടെയും ശ്രദ്ധനേടിയ ഉണ്ണി സ്ഥിരവരുമാനമെന്ന ആഗ്രഹവുമായി ജോലിയിൽ പ്രവേശിക്കുകയാണ് നാളെ മുതൽ. കാസർകോട് ഗവ. പോസ്റ്റ് മെട്രിക് ഹോസ്റ്റലിൽ ‘സ്കാവഞ്ചർ’ തസ്തികയിലാണ് ജോലിയിൽ പ്രവേശിക്കുന്നത്. ശൗചാലയം വൃത്തിയാക്കലാണ് തൊഴിൽ.

നടനായ ഉണ്ണിയെ ഇങ്ങനൊരു ജോലിക്ക് കണ്ട് ഞെട്ടിയ ഇന്റർവ്യൂ ബോർഡിന് മുന്നിൽ എല്ലാ ജോലിക്കും അതിന്റെതായ മഹത്വമുണ്ടെന്നും ഞാനല്ലെങ്കിൽ മറ്റൊരാൾ ഇത് ചെയ്യണ്ടതല്ലേ പിന്നെ എന്തുകൊണ്ട് തനിക്ക് ചെയ്തുകൂടാ എന്നും ചോദിച്ചാണ് ഉണ്ണി നിയമനം നേടിയെടുത്തിരിക്കുന്നത്.

പതിനൊന്ന് പേരാണ് ഒറ്റ ഒഴിവിലേക്ക് അഭിമുഖത്തിനെത്തിയത്. ഉണ്ണിയെ കണ്ടതോടെ ഇന്റർവ്യൂ ബോർഡ് അംഗങ്ങൾ തൊഴിലിനെ കുറിച്ചുള്ള ധാരണ നൽകി. “കുറച്ച് ബുദ്ധിമുട്ടുള്ള തൊഴിലാണ്. ഒരു ഒഴിവിലേക്ക് അഭിമുഖത്തിനെത്തിയ പതിനൊന്നുപേരിൽ ഒരാളാണ് ഉണ്ണിരാജൻ. ചെറിയ ശമ്പളമാണെങ്കിലും സ്ഥിരംതൊഴിലാണ്. പ്രമോഷൻ ലഭിച്ചാൽ സ്വീപ്പറും പിന്നെ അറ്റൻഡറും ഒക്കെയായിപ്പോകാൻ സാധ്യതയുണ്ട്”, ഇതും പറഞ്ഞവർ ഉണ്ണിയെ നോക്കി.

ഉടനെ ഉണ്ണി മറുപടിയും നൽകി, “ഒരു ജോലി എന്റെ സ്വപ്നമാണ് സർ. കുറച്ച്‌ സമയം മുൻപ് പുറത്തുനിൽക്കുന്ന എല്ലാവരും എന്റെ സെൽഫിയെടുത്തു. അവർക്ക് ഞാൻ വി.ഐ.പിയാണ്. പക്ഷേ, സ്ഥിരമായ തൊഴിലില്ലല്ലോ. സീരിയിലിൽ നിന്ന് അത്ര വരുമാനമൊന്നും ലഭിക്കില്ല. ജോലിക്കിടെ വീണു പരുക്കേറ്റതിനാൽ ശാരീരികാവസ്ഥയും നല്ലതല്ല. പിന്നെ എല്ലാ തൊഴിലിനും അതിന്റെ മഹത്ത്വമുണ്ട്. ഗാന്ധിജിപോലും കക്കൂസ് വൃത്തിയാക്കിയിട്ടില്ലേ. ഞാനല്ലെങ്കിൽ മറ്റൊരാൾ ഇത് ചെയ്യേണ്ടതല്ലേ. പിന്നെ എനിക്ക് ചെയ്താലെന്താ.’’ ഉണ്ണി ചോദിച്ചു.

ചെറുവത്തൂർ സ്വദേശി പരേതനായ കണ്ണൻ നായരുടെയും ഓമനയുടെയും മകനായ ഉണ്ണി രാജൻ നേരത്തെ നിർമ്മാണ തൊഴിലാളിയായിരുന്നു. ഭാര്യയും രണ്ടുകുട്ടികളുമുണ്ട്.

Also Read: മാതൃദിനത്തിൽ അമ്മയ്‌ക്കൊപ്പം താരങ്ങൾ; ചിത്രങ്ങൾ

Stay updated with the latest news headlines and all the latest Entertainment news download Indian Express Malayalam App.

Web Title: Actor unni raj posted as scavenger in kasaragod gov postmetric hostel