വിവാഹം അവസാനിപ്പിച്ചെങ്കിലും സൗഹൃദം ബാക്കിയുണ്ടല്ലോ; നിറചിരിയുമായി ആമിർ ഖാനും കിരണും

വേർപിരിഞ്ഞാൽ പരസ്പരം ശത്രുതയോടെ പെരുമാറുന്ന ദമ്പതികളെ കണ്ടു ശീലിച്ചവർക്ക് ആമിർ ഖാൻ ഒരു കൗതുകമാവും. മുൻഭാര്യമാരായ റീന ദത്തയും കിരൺ റാവുവുമൊക്കെയായി വളരെ സൗഹാർദ്ദപരമായ ബന്ധമാണ് ആമിർ ഖാൻ പുലർത്തുന്നത്.

ജെൻഡർ സെൻസിറ്റൈസേഷൻ പ്രോഗ്രാമിൻ്റെ ഭാഗമായി സുപ്രീം കോടതിയിൽ വെള്ളിയാഴ്ച നടന്ന ലാപത ലേഡീസിന്റെ പ്രദർശനത്തിൽ തുടർന്നു നടന്ന സംവാദത്തിലും കിരൺ റാവുവിനൊപ്പം ആമിർ ഖാനും പങ്കെടുത്തിരുന്നു.

വളരെ സൗഹൃദപൂർവ്വം പെരുമാറുന്ന ആമിറിനെയും കിരണിനെയുമാണ് വേദിയിൽ കണ്ടത്.

സുപ്രീം കോടതിയുടെ 75-ാം വാർഷികത്തോടു അനുബന്ധിച്ചാണ് കോടതിയുടെ അഡ്മിനിസ്ട്രേറ്റീവ് കെട്ടിട സമുച്ചയത്തിൽ പരിപാടി സംഘടിപ്പിക്കപ്പെട്ടത്. സുപ്രീം കോടതി ജഡ്ജിമാരും അവരുടെ ജീവിത പങ്കാളികളും രജിസ്ട്രിയിലെ അംഗങ്ങൾക്കും വേണ്ടിയായിരുന്നു പ്രത്യേക പ്രദർശനം സംഘടിപ്പിക്കപ്പെട്ടത്.

കിരൺ റാവു സംവിധാനം ചെയ്ത ലാപത ലേഡീസിന്റെ നിർമ്മാണം നിർവ്വഹിച്ചത് ആമിർ ഖാൻ ആയിരുന്നു.