68th National Film Awards: മികച്ച നടി അപർണ ബാലമുരളി , മികച്ച നടന്മാർ സൂര്യയും അജയ് ദേവ്ഗണും

68th National Film Awards: 68-ാമത് ദേശീയ ചലച്ചിത്ര പുരസ്കാരങ്ങൾ പ്രഖ്യാപിക്കുന്നു. ന്യൂഡൽഹിയിലെ നാഷണൽ അവാർഡ് സെന്ററിലാണ് അവാർഡ് പ്രഖ്യാപനം നടക്കുന്നത്. വിപുൽ​ ഷാ, ചിത്രാർത്ഥ സിങ്, അനന്ദ് വിജയ്, പ്രിയദർശാനന്ത് എന്നിവരാണ് ജൂറിയിലെ പ്രധാന അംഗങ്ങൾ.

അന്തരിച്ച സംവിധായകൻ സച്ചിയാണ് മികച്ച സംവിധായകൻ. ബിജു മേനോൻ മികച്ച സഹനടനായും നഞ്ചിയമ്മ മികച്ച ഗായികയായും തിരഞ്ഞെടുക്കപ്പെട്ടു. അപർണ ബാലമുരളിയാണ് മികച്ച നടി. മികച്ച നടനുള്ള അവാർഡ് അജയ് ദേവഗണും സൂര്യയും പങ്കിട്ടു. മലയാളത്തിലെ മികച്ച ഫീച്ചർ ഫിലിമായി സെന്ന ഹെഗ്‌ഡെയുടെ ‘തിങ്കളാഴ്ച നിശ്ചയം’ തിരഞ്ഞെടുത്തപ്പോൾ കാവ്യാ പ്രകാശിന്റെ ‘വാങ്ക്’ എന്ന ചിത്രത്തിന് പ്രത്യേക പരാമർശവും ലഭിച്ചു.

മലയാളത്തിനു ലഭിച്ച മറ്റു പുരസ്കാരങ്ങൾ

• മികച്ച ഓഡിയോഗ്രാഫി- വിഷ്ണു ഗോവിന്ദ്, ശ്രീ ശങ്കർ (മാലിക്ക്)
• മികച്ച പ്രൊഡക്ഷൻ ഡിസൈൻ- കപ്പേള (അനീസ് നാടോടി)
• മികച്ച ആക്ഷൻ കൊറിയോഗ്രാഫി- രാജശേഖർ, മാഫിയ ശശി, സുപ്രീം സുന്ദർ (അയ്യപ്പനും കോശിയും)
• മികച്ച ഫീച്ചർ ഫിലിം (മലയാളം)- തിങ്കളാഴ്ച നിശ്ചയം (സെന്ന ഹെഡ്ഗെ)
• സ്പെഷൽ മെൻഷൻ (ഫീച്ചർ ഫിലിം)- വാങ്ക് (കാവ്യ പ്രകാശ്)
• മികച്ച വിദ്യഭ്യാസചിത്രം- ഡ്രീമിംഗ് ഓഫ് വേർഡ്സ് (നന്ദൻ)
• മികച്ച ഛായാഗ്രാഹകൻ- നിഖിൽ എസ് പ്രവീൺ (ശബ്ദിക്കുന്ന കലപ്പ)
• മികച്ച ചലച്ചിത്രഗ്രന്ഥം – എംടി; അനുഭവങ്ങളുടെ പുസ്തകം (അനൂപ് രാമകൃഷ്ണൻ)