കളിനിയമം അറിയാത്ത നിങ്ങള്‍ എന്തിനാണ് 'ഗെയിം' കളിക്കാന്‍ ഇറങ്ങുന്നത്?; ഗംഭീറിനോട് അതിഷി

ന്യൂഡല്‍ഹി: അനുമതി ഇല്ലാതെ റാലി നടത്തിയതിന് ക്രിക്കറ്റ് താരവും ബിജെപി സ്ഥാനാർഥിയും ആയ ഗൗതം ഗംഭീറിനെതിരെ ഡല്‍ഹി പൊലീസ് കേസെടുത്തതിന് പിന്നാലെ എതിര്‍ സ്ഥാനാര്‍ത്ഥിയും എഎപി നേതാവുമായ അതിഷി രംഗത്ത്. കളിയുടെ നിയമം അറിയാത്തയാള്‍ എന്തിനാണ് ഗെയിം കളിക്കുന്നതെന്ന് അതിഷി ചോദിച്ചു.

തിരഞ്ഞെടുപ്പ് കമ്മീഷന്റെ നിര്‍ദേശത്തെ തുടര്‍ന്നാണ് പൊലീസ് ഗംഭീറിനെതിരെ കേസെടുത്തത്. ഏപ്രിൽ 25ന് ഡല്‍ഹിയിലെ ജംഗ്പുരയില്‍ നടത്തിയ റാലി തിരഞ്ഞെടുപ്പ് പെരുമാറ്റ ചട്ടത്തിന്റെ ലംഘനമാണെന്ന് തിരഞ്ഞെടുപ്പ് കമ്മീഷന്‍ അറിയിച്ചു. ട്വീറ്റിലൂടെയായിരുന്നു അതിഷി ഗംഭീറിനെതിരെ രംഗത്തെത്തിയത്.

'ആദ്യം നാമനിര്‍ദേശ പത്രികയില്‍ ചേര്‍ച്ചക്കുറവ് ഉണ്ടായിരുന്നു, പിന്നീട് രണ്ട് വോട്ടേഴ്സ് ഐഡി കൈയില്‍ വെച്ച ക്രിമിനല്‍ കുറ്റം ചെയ്തു. ഇപ്പോള്‍ നിയമവിരുദ്ധമായ റാലി നടത്തിയതിന് പൊലീസ് കേസും. എനിക്ക് ഗംഭീറിനോട് ചോദിക്കാനുളളത് ഇതാണ്, നിയമം അറിയാത്ത നിങ്ങള്‍ എന്തിനാണ് ഈ ഗെയിം കളിക്കുന്നത്?,' അതിഷി ട്വീറ്റ് ചെയ്തു.

കഴിഞ്ഞ മാസമാണ് ഗംഭീര്‍ ബിജെപിയില്‍ ചേര്‍ന്നത്. പിന്നീട് ഈസ്റ്റ് ഡല്‍ഹിയില്‍ നിന്നും ഗംഭീറിനെ മത്സരിപ്പിക്കാന്‍ പാര്‍ട്ടി തീരുമാനിക്കുകയായിരുന്നു. കോണ്‍ഗ്രസിന് വേണ്ടി അര്‍വീന്ദര്‍ സിങ് ലൗലിയും എഎപിക്ക് വേണ്ടി അതിഷിയും ആണ് ഇവിടെ മത്സരിക്കുന്നത്.