90 ശതമാനത്തിലധികം പോളിങ് നടന്ന ബൂത്തുകളില്‍ റീപോളിങ് ആവശ്യപ്പെട്ട് യുഡിഎഫ്

തിരുവനന്തപുരം: കാസര്‍കോഡ് ലോക് സഭ മണ്ഡലത്തില്‍ 90 ശതമാനമോ അതിലധികമോ പോളിംഗ് നടന്ന ബൂത്തുകളില്‍ റീപോളിംഗ് വേണമെന്ന് ആവശ്യപ്പെട്ട് യുഡിഎഫ്. നൂറിലധികം ബൂത്തുകളില്‍ റീപോളിംഗ് വേണമെന്നാണ് ആവശ്യം. കാസര്‍കോട് മണ്ഡലത്തില്‍ ഉള്‍പ്പെട്ട പിലാത്തറയിലെ ബൂത്തില്‍ കള്ളവോട്ട് നടന്നതായി ആരോപണം ഉയര്‍ന്നതിന്റെ പശ്ചാത്തലത്തിലാണ് യുഡിഎഫ് ഈ ആവശ്യം ഉന്നയിച്ചിരിക്കുന്നത്.

Read More: കള്ളവോട്ട് ആരോപണം: കണ്ണൂര്‍, കാസര്‍കോട് കലക്ടര്‍മാര്‍ ഇന്ന് റിപ്പോര്‍ട്ട് സമര്‍പ്പിച്ചേക്കും

ലോക് സഭ തിരഞ്ഞെടുപ്പിന്റെ മൂന്നാം ഘട്ട വോട്ടെടുപ്പിലാണ് കേരളത്തിലെ 20 ലോക് സഭാ മണ്ഡലങ്ങളിലും പോളിങ് നടന്നത്. കാസര്‍കോഡ് മണ്ഡലത്തില്‍ 126 ബൂത്തുകളിലാണ് 90 ശതമാനത്തിലധികം വോട്ടിംഗ് രേഖപ്പെടുത്തിയിട്ടുള്ളത്. അതില്‍ 100 ബൂത്തുകളില്‍ റീപോളിംഗ് വേണമെന്നാണ് യുഡിഎഫ് ആവശ്യമുന്നയിക്കുന്നത്. റീപോളിംഗ് ആവശ്യപ്പെട്ട് നേതാക്കള്‍ ജില്ലാ കളക്ടറെ കാണുന്നുണ്ട്.

Read More: കള്ളവോട്ട് ചെയ്യുന്നതിന്റെ ദൃശ്യങ്ങള്‍ പുറത്തുവിട്ട് കോണ്‍ഗ്രസ്

കാസര്‍കോട്ടെ തൃക്കരിപ്പൂര്‍, കല്യാശ്ശേരി, പയ്യന്നൂര്‍, കാഞ്ഞങ്ങാട് എന്നീ നിയമസഭാ മണ്ഡലങ്ങളിലെ ബൂത്തുകളിലാണ് റീപോളിങ് ആവശ്യപ്പെട്ടിരിക്കുന്നത്.

കള്ളവോട്ട് നടന്നതിനെക്കുറിച്ചുള്ള ജില്ലാ കളക്ടര്‍ മിര്‍ മുഹമ്മദ് അലിയുടെ റിപ്പോര്‍ട്ട് കേന്ദ്ര തെരഞ്ഞെടുപ്പ് കമ്മീഷന്റെ പരിഗണനയ്ക്കു വിടും. മുഖ്യ തെരഞ്ഞെടുപ്പ് ഓഫീസര്‍ ടിക്കാറാം മീണ ഇന്ന് കമ്മീഷനു റിപ്പോര്‍ട്ട് കൈമാറും. അതിനുശേഷം കമ്മീഷന്‍ തുടര്‍നടപടികള്‍ സ്വീകരിക്കും.