പ്രിയങ്കയുടെ വരവ് ഉത്തര്‍പ്രദേശില്‍ ഒരു മാറ്റവും ഉണ്ടാക്കില്ല: യോഗി ആദിത്യനാഥ്

ലക്‌നൗ: പ്രിയങ്ക ഗാന്ധി വാധ്‌രയുടെ രാഷ്ട്രീയ പ്രവേശനം ഉത്തര്‍പ്രദേശില്‍ ഒരു മാറ്റവുമുണ്ടാക്കില്ലെന്ന് മുഖ്യമന്ത്രി യോഗി ആദിത്യനാഥ്. പ്രിയങ്കയുടെ വരവ് ബിജെപിയുടെ വോട്ടുകളെ സ്വാധീനിക്കില്ലെന്നും യോഗി പറഞ്ഞു.

പ്രിയങ്ക ഗാന്ധിയെ കോണ്‍ഗ്രസ് കിഴക്കന്‍ യുപിയുടെ ചുമതലയുള്ള ജനറല്‍ സെക്രട്ടറിയാക്കി. അത് ആ പാര്‍ട്ടിയുടെ ആഭ്യന്തര കാര്യം മാത്രമാണ്. ഇതുകൊണ്ടൊന്നും ഉത്തര്‍പ്രദേശില്‍ ഒരു മാറ്റവും സംഭവിക്കാന്‍ പോകുന്നില്ലെന്നും യോഗി വാര്‍ത്താ ഏജന്‍സിയായ പിടിഐയോട് പറഞ്ഞു.

Read More: ‘ഇത്തവണയും മോദി ജയിച്ചാല്‍ ഇനിയൊരു തിരഞ്ഞെടുപ്പുണ്ടാകില്ല’; വിവാദ പ്രസ്താവനയുമായി ബിജെപി എംപി

കോണ്‍ഗ്രസിനായി പ്രിയങ്ക മുന്‍പും പ്രചാരണത്തിന് ഇറങ്ങിയിട്ടുണ്ട്. അന്നൊന്നും ഒരു പ്രയോജനവും യുപിയില്‍ കോണ്‍ഗ്രസിനുണ്ടായിട്ടില്ല. ഇത്തവണയും അങ്ങനെ തന്നെയായിരിക്കുമെന്നും യോഗി പറഞ്ഞു.

ഉത്തര്‍പ്രദേശിലെ എസ്‌പി - ബിഎസ്‌പി സഖ്യത്തെയും യോഗി പരിഹസിച്ചു. ഇപ്പോള്‍ തന്നെ ആ സഖ്യത്തിനുള്ളില്‍ പൊട്ടിത്തെറികളും പ്രശ്‌നങ്ങളും ഉണ്ടെന്നും ബിജെപിക്കെതിരായ സഖ്യം അമ്പേ പരാജയമാണെന്നും യോഗി ആദിത്യനാഥ് കൂട്ടിച്ചേര്‍ത്തു.