കള്ളവോട്ട് ചെയ്യുന്നതിന്റെ ദൃശ്യങ്ങള്‍ പുറത്തുവിട്ട് കോണ്‍ഗ്രസ്

കണ്ണൂര്‍: ലോക്‌സഭാ തിരഞ്ഞെടുപ്പില്‍ കള്ളവോട്ട് നടന്നതിന് തെളിവ് പുറത്ത്. കാസര്‍കോട് മണ്ഡലത്തില്‍ ഉള്‍പ്പെടുന്ന കണ്ണൂര്‍ ജില്ലയിലെ പിലാത്തറ എയുപി സ്‌കൂളില്‍ കള്ളവോട്ട് നടന്നെന്നാണ് ആരോപണം. ഒരു സ്ത്രീ രണ്ട് തവണ വോട്ട് ചെയ്യുന്ന ദൃശ്യങ്ങളാണ് മാധ്യമങ്ങള്‍ പുറത്തുവിട്ടിരിക്കുന്നത്. വ്യാജ തിരിച്ചറിയല്‍ രേഖകള്‍ ഉപയോഗിച്ചാണ് വോട്ട് ചെയ്തതെന്നും ആരോപിക്കുന്നുണ്ട്.

കോണ്‍ഗ്രസാണ് ആരോപണവുമായി രംഗത്തെത്തിയിരിക്കുന്നത്. സിപിഎം വ്യാപകമായി കള്ളവോട്ട് ചെയ്‌തെന്നാണ് കോണ്‍ഗ്രസ് ആരോപണം. പിലാത്തറ സ്‌കൂളിലെ 19-ാം നമ്പര്‍ ബൂത്തിലെ കള്ളവോട്ട് ദൃശ്യങ്ങളാണ് പുറത്തുവിട്ടിരിക്കുന്നതെന്ന് കോണ്‍ഗ്രസ് പറഞ്ഞു. പിലാത്തറ സ്‌കൂളിലെ 19-ാം നമ്പര്‍ ബൂത്തില്‍ വോട്ട് ചെയ്യുന്ന സ്ത്രീക്ക് ശരിക്കും വോട്ട് ഉള്ളത് 17-ാം നമ്പര്‍ ബൂത്തിലാണെന്നും വ്യാജ രേഖകള്‍ ഉപയോഗിച്ചാണ് കള്ളവോട്ട് നടന്നതെന്നും കാസര്‍കോട് ലോക്‌സഭാ മണ്ഡലം യുഡിഎഫ് സ്ഥാനാര്‍ഥി രാജ്‌മോഹന്‍ ഉണ്ണിത്താന്‍ പറഞ്ഞു.

കള്ളവോട്ട് ചെയ്തവരില്‍ പഞ്ചായത്തംഗവും മുന്‍ പഞ്ചായത്തംഗവും ഉണ്ടെന്ന് ദൃശ്യങ്ങള്‍ ചൂണ്ടിക്കാട്ടി കോണ്‍ഗ്രസ് ആരോപിക്കുന്നു. കണ്ണൂര്‍ ചെറുതാഴം പഞ്ചായത്തംഗം സെലീന എം.പി കള്ളവോട്ട് ചെയ്‌തെന്നാണ് കോണ്‍ഗ്രസ് ആരോപിച്ചത്. ഒരാള്‍ ആളുമാറി വോട്ട് ചെയ്യുന്നതും മറ്റൊരാള്‍ രണ്ട് തവണ വോട്ട് ചെയ്യുന്നതും ദൃശ്യങ്ങളിലുണ്ട്.

കള്ളവോട്ട് നടന്നെന്ന ആരോപണത്തിന് പിന്നാലെ സംസ്ഥാനത്തെ മുഖ്യ തിരഞ്ഞെടുപ്പ് ഓഫീസര്‍ ടിക്കാറാം മീണ റിപ്പോര്‍ട്ട് തേടിയിട്ടുണ്ട്. കള്ളവോട്ട് നടന്നിട്ടുണ്ടെങ്കില്‍ അത് ഗുരുതരമായ പ്രശ്‌നമാണെന്ന് ടിക്കാറാം മീണ ചൂണ്ടിക്കാട്ടി.