ജെഇഇ മെയിൻ പരീക്ഷാ ഫലം ഇന്ന് പ്രസിദ്ധീകരിക്കും

ന്യൂഡൽഹി: ജെഇഇ മെയിൻ സെഷൻ 2 പരീക്ഷാ ഫലം നാഷണൽ ടെസ്റ്റിങ് ഏജൻസി (എൻടിഎ) ഇന്നു പ്രസിദ്ധീകരിക്കും. ഫലം പ്രസിദ്ധീകരിച്ചശേഷം nta. ac.in, ntaresults.nic.in, jeemain. nta.nic.in എന്നീ വെബ്സൈറ്റുകൾ വഴി വിദ്യാർത്ഥികൾക്ക് സ്കോർകാർഡ് ഡൗൺലോഡ് ചെയ്യാം.

ഈ വർഷം ജെഇഇ മെയിൻ സെഷൻ 2 പരീക്ഷ ജൂലൈ 21 മുതൽ ജൂലൈ 30 വരെ നടത്താനാണ് നേരത്തെ നിശ്ചയിച്ചിരുന്നത്. എന്നാൽ പിന്നീട് ജെഇഇ മെയിൻ പരീക്ഷകൾ മാറ്റിവച്ചതായും ജൂലൈ 25 മുതൽ നടത്തുമെന്നും അറിയിച്ചു. ഈ വർഷം സെഷൻ 2 പരീക്ഷയ്ക്ക് 8 ലക്ഷത്തോളം ഉദ്യോഗാർത്ഥികൾ അപേക്ഷിച്ചിരുന്നു. ജെഇഇ മെയിൻ സെഷൻ 1 പരീക്ഷകളുടെ ഫലം ജൂലൈ 12 ന് പ്രസിദ്ധീകരിച്ചിരുന്നു.

ദേശീയതല സ്ഥാപനങ്ങളിലെ എൻജിനിയറിങ്/ടെക്‌നോളജി/ആർക്കിടെക്ചർ/പ്ലാനിങ്/ബിരുദതല കോഴ്‌സുകളിലെ പ്രവേശനത്തിനായി നാഷണൽ ടെസ്റ്റിങ് ഏജൻസി (എൻടിഎ) നടത്തുന്ന ജോയിന്റ് എൻട്രൻസ് എക്സാമിനേഷൻ (ജെഇഇ) പരീക്ഷയാണിത്. വർഷത്തിൽ രണ്ടുതവണയാണ് ജെഇഇ മെയിൻ നടത്തുന്നത്. ഒരാൾക്ക് രണ്ടു പരീക്ഷയും വേണമെങ്കിൽ എഴുതാം. രണ്ടുപരീക്ഷകളും എഴുതുന്നവരുടെ ഭേദപ്പെട്ട സ്കോർ അന്തിമറാങ്കിങ്ങിനായി പരിഗണിക്കും.