സിയുഇടി പരീക്ഷാ ഫലം പ്രഖ്യാപിച്ചു

ന്യൂഡൽഹി: കേന്ദ്ര സർവകലാശാലകളിലെ ബിരുദ കോഴ്സുകളിലേക്കുള്ള പൊതുപ്രവേശന പരീക്ഷയുടെ ഫലം (സിയുഇടി-യുജി) പ്രഖ്യാപിച്ചു. ഒദ്യോഗിക വെബ്സൈറ്റായ cuet.samarth.ac.in വഴി വിദ്യാർത്ഥികൾക്ക് ഫലം പരിശോധിക്കാം. ഈ വർഷം മേയ് 21 മുതൽ ജൂൺ 23 വരെയാണ് പരീക്ഷ നടന്നത്. ഈ വർഷം 14.99 ലക്ഷം വിദ്യാർത്ഥികളാണ് പരീക്ഷയ്ക്ക് രജിസ്റ്റർ ചെയ്തത്.

രാജ്യത്തെ കേന്ദ്ര സർവകലാശാലകളിലെ യുജി, പിജി, ഇന്റഗ്രേറ്റഡ് പ്രോഗ്രാമുകള്‍ എന്നിവയിലേക്കുള്ള പ്രവേശനം വാഗ്ദാനം ചെയ്യുന്ന ദേശീയതല പ്രവേശന പരീക്ഷയാണ് സെന്‍ട്രല്‍ യൂണിവേഴ്സിറ്റി കോമണ്‍ എന്‍ട്രന്‍സ് ടെസ്റ്റ്. 44 കേന്ദ്ര, 31 സംസ്ഥാന സർവകലാശാലകളും 27 ഡീംഡ് യൂണിവേഴ്സിറ്റികളും 66 സ്വകാര്യ യൂണിവേഴ്സിറ്റികളുമാണു സിയുഇടിയുടെ അടിസ്ഥാനത്തിൽ പ്രവേശനം നടത്തുന്നത്. കാർഷിക സർവകലാശാലകളിലേക്കുള്ള പ്രവേശനവും സിയുഇടിയുടെ അടിസ്ഥാനത്തിലാണ്.

നേരത്തെ, 12-ാം ക്ലാസിലെമാര്‍ക്കിന്റെ അടിസ്ഥാനത്തിലാണ് വിദ്യാര്‍ത്ഥികള്‍ക്ക് വിവിധ സര്‍വകലാശാലകളില്‍ പ്രവേശനം ലഭിച്ചിരുന്നത്. എന്നാല്‍ ഇപ്പോൾ വിവിധ സര്‍വകലാശാലകളിലെ കോഴ്‌സുകളിലേക്ക് പ്രവേശനം നേടുന്നതിന് പൊതു അഭിരുചി പരീക്ഷയ്ക്ക് ഹാജരാകേണ്ടതുണ്ട്. ഡല്‍ഹി യൂണിവേഴ്സിറ്റി, ജാമിയ മിലിയ ഇസ്ലാമിയ, ജവഹര്‍ലാല്‍ നെഹ്റു യൂണിവേഴ്സിറ്റി എന്നിവയുള്‍പ്പെടെ എല്ലാ കേന്ദ്ര സര്‍വകലാശാലകളിലേക്കുമുള്ള പ്രവേശനത്തിന് പൊതു പ്രവേശന പരീക്ഷയിലെ സ്‌കോറുകളായിരിക്കും മാനദണ്ഡമാവുക.