കലാ രംഗത്തുനിന്നാണ് മഞ്ജു വാര്യർ സിനിമയിലേക്ക് വരുന്നത്. രണ്ട് വർഷം തുടർച്ചയായി സംസ്ഥാന സ്കൂൾ യുവജനോത്സവത്തിൽ കലാ തിലകം പട്ടം അണിഞ്ഞിട്ടുണ്ട്.

1979 സെപ്റ്റംബർ 10 നാണ് മഞ്ജുവിന്റെ ജനനം. 1995-ൽ പുറത്തിറങ്ങിയ സാക്ഷ്യം എന്ന ചലച്ചിത്രത്തിലാണ് ആദ്യമായി അഭിനയിച്ചത്. 18-ാമത്തെ വയസ്സിൽ സല്ലാപം (1996) എന്ന ചലച്ചിത്രത്തിലൂടെ നായികയായി. ഇതിലെ മഞ്ജുവിന്റെ കഥാപാത്രം ഏറെ ശ്രദ്ധിക്കപ്പെട്ടു. തുടർന്നിങ്ങോട്ട് മുപ്പതോളം സിനിമകളിൽ അഭിനയിച്ചു. ഈ പുഴയും കടന്ന്, ആറാം തമ്പുരാൻ, കൃഷ്ണഗുഡിയിൽ ഒരു പ്രണയകാലത്ത്, പ്രണയവർണ്ണങ്ങൾ, സമ്മർ ഇൻ ബത്‌ലഹേം എന്നിവ മഞ്ജുവിന്റെ ഹിറ്റ് ചിത്രങ്ങളാണ്.

1998 ഒക്ടോബർ 20 ന് നടൻ ദിലീപിനെ വിവാഹം ചെയ്‌തതോടെ അഭിനയരംഗത്തുനിന്നും മാറിനിന്നു. 2014-ൽ ദിലീപുമായുളള വിവാഹബന്ധം വേർപ്പെടുത്തി. ഈ ബന്ധത്തിൽ മീനാക്ഷി എന്ന മകളുണ്ട്.  2014 ൽ പുറത്തിറങ്ങിയ ഹൗ ഓൾഡ് ആർ യുവിലൂടെയാണ് മഞ്ജു മലയാള സിനിമയിലേക്ക് മടങ്ങിയെത്തിയത്.

രണ്ടാം വരവിൽ എന്നും എപ്പോഴും, റാണി പത്മിനി, ജോ ആന്ര് ബോയ്, വേട്ട, കരിങ്കുന്നം സിക്സസ്, കെയ്റ് ഓഫ് സൈറ ബാനു, ഉദാഹരണം സുജാത, വില്ലൻ എന്നീ സിനിമകളിൽ അഭിനയിച്ചു. ആമി, മോഹൻലാൽ എന്നിവയാണ് 2018 ൽ പുറത്തിറങ്ങിയ മഞ്ജുവിന്റെ സിനിമകൾ. ഒടിയനാണ് ഇനി പുറത്തിറങ്ങാനുളളത്